دہرادون ۔4 جون(سیاست ڈاٹ کام)مقابلہ کے بہترین کھلاڑی راشد خان کی شاندار بولنگ کی بدولت افغانستان نے بنگلہ دیش کو پہلے ٹی20 میچ میں 45 رنز سے شکست دے کر 3 میچوں کی سیریز میں 1-0 کی برتری حاصل کر لی۔پہلے ٹی ٹونٹی میچ میں افغانستان نے پہلے بیٹنگ کرتیہوئے مقررہ اوورز میں 8 وکٹوں کے نقصان پر 167 رنز بنائے۔محمد شہزاد 40، سمیع اللہ شنواری نے 3 چھکوں اور 3 چوکوں کی مدد سے 36 رنز کی جارحانہ اننگز کھیلی جبکہ شفیق اللہ نے 3 چھکوں کی مدد سے 24 رنز بنا کر ٹیم کی پوزیشن مستحکم کی۔دیگر کھلاڑیوں میں عثمان غنی 26، کپتان اصغر استنکزئی 25، شفیق اللہ 24، نجیب اللہ زدران 2، محمد نبی اور کریم صادق بغیر کوئی رن بنائے آؤٹ ہوئے۔بنگلہ دیش کی جانب سے ابوالحسن اور محموداللہ نے فی کس 2 شکیب الحسن، ابو جاوید اور روبیل حسین نے ایک وکٹ لی۔ہدف کے تعاقب میں افغانستانی بولروں کے سامنے بنگلہ دیش کا بیٹنگ شعبہ ریت کی دیوار ثابت ہوا اور پوری ٹیم 19 اوورز میں 122 رنز بنا کر پویلین لوٹ گئی۔مجیب الرحمان نے پہلے ہی اوور کی پہلی ہی گیند پر تمیم اقبال کو آؤٹ کر کے حریف ٹیم پر دباؤ بڑھا دیا جس کے بعد کوئی بھی کھلاڑی متاثر کن کارکردگی نہ کر سکا۔لٹن داس 30، کپتان شکیب الحسن 15، مشفیق الرحیم 20، محموداللہ 29، مصدق حسین 14، ابوالحسن 5، ابوجاوید 1، صابررحمن اور روبیل حسین بغیر کوئی رن بنائے آؤٹ ہوئے۔مین آف دی میچ راشدخان نے 13رنز کے عوض 3 وکٹیں حاصل کیں جبکہ شاہ پور زدران نے 3 اور محمد نبی نے 2 وکٹیں حاصل کیں۔
