دبئی ۔24 ستمبر(سیاست ڈاٹ کا م) ایشیا کپ کے اہم میچ میں بنگلہ دیش نے افغانستان کو 3 رنز سے شکست دے کر سوپر فور مرحلے میں اپنا پہلا میچ جیت لیا۔ افغانستان شکست کے ساتھ ایونٹ سے باہر ہوگیا ہے اس مقابلے میں محمود اللہ کے 74 اور عمرالقیص نے 72رنز بناکرٹیم کی جیت میں اہم کردارادا کیا۔ابوظہبی میں سوپر فور کے میچ میں بنگلہ دیش کی جانب سے دیے گئے 250 رنز کے ہدف کے تعاقب میں افغانستان نے حریف بولرز کا ڈٹ کر مقابلہ کیا لیکن آخر میں انہیں 3 رنز سے شکست ہوئی اور بنگلہ دیش نے ایونٹ میں اپنی پہلی کامیابی حاصل کی۔افغان ٹیم کی جانب سے حشمت اللہ شاہدی 71، محمد شہزاد 53 اور کپتان اصغر افغان 39رنز بنا کر نمایاں رہے تاہم حریف بولروں کی جانب سے مشرفی مرتضی نے 2 ، مستفیض الرحمن اور محمود اللہ نے فی کس ایک وکٹ لی۔ قبل ازیں ٹاس جیت کے پہلے بیٹنگ کرنے والی بنگلہ دیشی ٹیم نے مقررہ 50 اوورز میں7وکٹوں کے نقصان پر 249رنز اسکور کیے۔ محمود اللہ74 اور عمرالقیص72رنز بنا کر نمایاں رہے۔
