کراچی ۔ یکم نومبر (سیاست ڈاٹ کام) پاکستانی اوپنر اظہر علی نے ونڈے کرکٹ سے سبکدوشی کا اعلان کر دیا ہے، انہوں نے کہاکہ وہ صرف ٹسٹ کرکٹ پر توجہ مرکوز رکھنا چاہتے ہیں۔ پاکستانی ٹیم کی جانب سے 53 ونڈے کھیلنے کے بعد اظہر علی نے ونڈے کرکٹ چھوڑنے کا فیصلہ کرلیا۔ انہوں نے قذافی اسٹیڈیم میں پریس کانفرنس کرتے ہوئے اپنی سبکدوشی کا اعلان کیا اور اس موقع پر وہ کافی مطمئن نظر آرہے تھے۔ اوپنر نے کہاکہ نوجوان کرکٹرز ونڈے میں بہت اچھا کھیل رہے ہیں، ٹیم کا ایک کمبی نیشن بنا ہوا ہے اس میں خلل پیدا نہیں کیا جاسکتا اس لئے انہوں نے ونڈے چھوڑنے کا فیصلہ کیا ہے اور اب وہ ساری توجہ ٹسٹ کرکٹ پر کرنا چاہتے ہیں۔اظہر علی نے 53 ونڈے مقابلوں میں پاکستان کی نمائندگی کی اور 36.90 کی اوسط سے 1845 رنز اسکور کئے۔انہوں نے کیریئر میں 3 سنچریاں اور 12 نصف سنچریاں اسکور کیں۔ اظہرنے آخری ونڈے 13 جنوری 2108 کو ڈونیڈن میں نیوزی لینڈ کے خلاف کھیلا تھا، واضح رہے کہ 2015 میں انہیں پاکستان ونڈے ٹیم کا کپتان بھی بنایا گیا تھا۔
