میڈرڈ۔24 اکٹوبر (سیاست ڈاٹ کام ) اسپین نے ورلڈ چمپئن شپ کے لئے پاکستان کراٹے ٹیم کو ویزا دینے سے انکار کردیا۔ میڈرڈ میں 6 نومبر کو ورلڈ سئنیرکراٹے چمپئن شپ شروع ہورہی ہے جو کہ 2020 اولمپکس کا کوالیفائنگ راؤنڈ بھی ہے، اس ایونٹ کے لئے 4 رکنی پاکستانی ٹیم نصیر احمد، کلثوم ، نرگس اور کوچ شاہ محمد نے اسپین کی ایمبیسی میں ویزا کے لئے درخواست جمع کروائی تھی جو کہ مسترد کردی گئی ہے۔ ان کے ساتھ کوچنگ کورس میں شرکت کے خواہشمند بابر اقبال اور محمد کاشف کو بھی ویزا دینے سے انکار کردیا گیا ہے۔کھلاڑیوں نے اسپین کی جانب سے اس سلوک پر سخت افسوس کا اظہار کیا اور حکومت سے مطالبہ کیا ہے کہ پاکستان کی پہچان بننے والے میڈلسٹس کو عالمی ایونٹ میں شرکت سے محروم رکھے جانے کا نوٹس لینا چاہئے۔ پاکستان کراٹے فیڈریشن کے صدر محمد جہانگیر نے میڈیا کو بتایا کہ نصیر احمد کو آئی او سی نے اسکالرشپ دے رکھی ہے، انہیں ورلڈ چمپئن شپ میں حصہ لینے کے نمبر ملنا تھے۔ جس سے اسے اولمپکس میں شرکت کے لیے مدد ملتی لیکن بڑے دکھ کی بات ہے کہ کسی کو بھی ویزا نہیں دیا گیا۔ انہوں نے یہ جواز پیش کیا کہ کھلاڑیوں کے پاکستان واپس آنے کا یقین نہیں، یہ تمام کھلاڑی ایک عرصے سے بیرون ملک پاکستان کی نمائندگی کے ساتھ میڈلز بھی جیت کر لارہے ہیں۔انتظامیہ نے درخواست کی ہے کہ اس واقعہ کا سخت نوٹ لیاجائے اور کھلاڑیوں کو ویزا فراہم کرنے کی سعی کی جائے نیز مستقبل میں ایسے واقعات کا ادراک بھی ہو۔
