سنچورین۔26 ڈسمبر (سیاست ڈاٹ کام )جنوبی افریقہ کے فاسٹ بولر ڈیل اسٹین نے پاکستانی اوپنر فخر زماں کو آوٹ کرتے ہوئے اپنے ملک کیلئے ٹسٹ میں سب سے زیادہ وکٹوں کا ریکارڈ اپنے نام کرلیا ہے جبکہ پاکستانی ٹیم باکسنگ ڈے ٹسٹ کی پہلی اننگز میں پہلے ہی دن 181 رنز پر ڈھیر ہوگئی۔جنوبی افریقہ کے خلاف پہلے ٹسٹ میں پاکستانی بیٹنگ شعبہ ایک بار پھر ناکام ہوگیا اور پوری ٹیم 181 رنز پر پویلین لوٹ گئی۔ پاکستان اور جنوبی افریقہ کے درمیان اسپورٹس پارک سنچورین میں کھیلے جارہے پہلے ٹسٹ میچ میں پاکستان نے ٹاس جیت کر پہلے بیٹنگ کا فیصلہ کیا، پاکستان کی جانب سے اننگز کا آغاز امام الحق اور فخرزمان نے کیا تاہم دونوں اوپنرز صرف 17 کے مجموعی اسکور پر آؤٹ ہوگئے، فخرزمان نے 12 رنز بنائے جب کہ امام الحق بغیر کوئی رن بنائے پویلین لوٹ گئے۔ زخمی حارث سہیل کی جگہ ٹیم میں شامل ہوئے شان مسعود بھی متاثر کن کارکردگی نہ دکھاسکے اور صرف 19 رنز پر آؤٹ ہوگئے جس کے بعد تجربہ کار اسد شفیق میدان میں اترے لیکن ان کی اننگز بھی صرف 7 رنز تک ہی محدود رہی، اظہر علی نے کچھ دیر مزاحمت کی تاہم وہ بھی اپنی اننگز کو 36 سے آگے نہ لے جاسکے جب کہ کپتان سرفراز احمد نے کھاتہ کھولنے کی بھی زحمت نہیں کی۔ بابراعظم نے ذمہ دارنہ بیٹنگ کا مظاہرہ کرتے ہوئے نصف سنچری اسکور کی اور پاکستان کا اسکورمستحکم کیا، وہ 71 رنز بناکر آؤٹ ہوئے جب کہ حسن علی نے بھی بابراعظم کا بھرپور ساتھ دیا اور وہ 20 رنز بناکر ناٹ آؤٹ رہے دونوں نے 8 ویں وکٹ کے کئے نصف سنچری کی پارٹنرشپ نبھائی۔ جنوبی افریقہ کی جانب سے ڈیان اولیور نے 6، کگیسو رابادا نے 3 اور ڈیل اسٹین نے ایک کھلاڑی کو پویلین کی راہ دکھائی۔ اسٹین کی یہ وکٹ ریکارڈ ساز رہی کیونکہ انہوں اس وکٹ کے ذریعہ 422 وکٹوں کا ہندسہ عبور کرتے ہوئے سابق کپتان شان پولاک کو پیچھے چھوڑدیا۔واضح رہے کہ اسی گراؤنڈ پر 8 سال پہلے گرائم اسمتھ کی زیر قیادت ٹیم نے پاکستان کو ایک اننگز اور 18 رنز سے شکست دی تھی۔
