ممبئی۔ 17اکٹوبر(سیاست ڈاٹ کام ) آئی سی سی نے ویسٹ انڈیز کرکٹ ٹیم کے کوچ اسٹورٹ لاء کو دو میچز کے لیے معطل کر دیا۔انٹرنیشنل کرکٹ کاؤنسل (آئی سی سی) نے ضابطہ اخلاق کی خلاف ورزی پر ویسٹ انڈیز کرکٹ ٹیم کے کوچ اسٹورٹ لاء کو دو میچز کے لیے معطل کردیا۔ ویسٹ انڈیز کے کوچ ہندوستان کے خلاف دوسرے ٹسٹ کے آخری روزکیران پوول کو آوٹ دینے پر غصے میں آگئے تھے اور انہوں نے ٹی وی امپائر کے کمرے میں جا کر متنازعہ جملے کسے اور بعد ازاں چوتھے امپائر کے پاس گئے جہاں کھلاڑیوں کی موجودگی میں ان کو برا بھلا کہا۔ آئی سی سی نے ویسٹ انڈیز کے کوچ کی حرکت پر نوٹس لیتے ہوئے ان پر میچ فیس کا صد فیصد جرمانہ عائد کرتے ہوئے تین ڈی میرٹ پوائنٹس دے دیے۔ 24 ماہ کے دوران 4 ڈی میرٹ پوائنٹس ہونے پر اسٹورٹ لاء کو ہندوستان کے خلاف ون ڈے سیریز کے پہلے دو میچوں کے لیے معطل کر دیا گیا۔
