قاہرہ22 اگسٹ (سیاست ڈاٹ کام) الجزائر کی معروف گلوکارہ سوعاد میسی نے غزہ پر جاری اسرائیلی بمباری کے خلاف بطور احتجاج اسرائیل میں اپنے فن کا مظاہرہ کرنے سے انکار کر دیا ہے۔ مصری روزنامہ الاہرام کی رپورٹ کے مطابق گلوکارہ نے یہ انکار اسرائیل کی طرف سے جاری اندھے قتل عام کے خلاف نفرت کے اظہار کے طور پر کیا ہے۔ گلوکارہ نے اس بارے میں کہا ، ’’ایک گلوکارہ کے طور پر یہ میرا حق ہے کہ ایک ایسے ملک میں پروگرام کرنے سے انکار کروں جو ملک ننھے بچوں کو قتل کرتا ہو، خواتین کے خون سے ہاتھ رنگتا ہو، حتی کہ حاملہ خواتین کی زندگی کا چراغ گل کر دیتا ہو اور بوڑھوں کا خون کرتا ہو‘‘۔ میسی نے مزید کہا،’’ ایک ایسا ملک جس کے فوجی ہر جاندار کو گولی مارنے کو بے چین ہوں، ایسے ملک میں گانے کا مطلب ہے کہ میں اس ملک کی اس دہشت گردی کی تائید کرتی ہوں‘‘۔ گلوکارہ نے اپنے انٹرویو کے دوران کہا کہ جب بھی مجھے اسرائیل میں فن کے اظہار کی دعوت دی گئی ،میں نے انکار کر دیا ہے۔ میسی نے کہا وہ امن کے لیے گاتی ہیں۔
