کولمبو ۔6 مئی (سیاست ڈاٹ کام ) سری لنکائی کرکٹ بورڈ نے ساحل سمندر پر پڑی ہوئی استعمال شدہ پلاسٹک کی بوتلوں کو ری سائیکل کرتے ہوئے کرکٹ ورلڈکپ کے لیے ٹیم کی جرسی تیار کرکے دنیا کو حیران کردیا۔ ورلڈ کپ 2019 کا میلہ انگلینڈ میں سجنے جارہا ہے جس کا آغاز رواں ماہ کے اختتام پر ہوجائے گا جہاں پہلے میچ میں میزبان ملک جنوبی افریقہ کا سامنا کرے گا۔کرکٹ کے 12ویں ورلڈ کپ میں 10 ٹیمیں مدِ مقابل ہوں گی جن کے اسکواڈ کا اعلان کردیا گیا جبکہ ایونٹ میں شریک ٹیموں کے کرکٹ بورڈز کی جانب سے ٹیم کی کٹ کی رونمائی بھی کی جارہی ہے۔ اسی سلسلے میں ایشیائی ملک سری لنکا نے بھی اپنی کٹ متعارف کروائی تاہم یہ کٹ دیگر ممالک کی کٹ کے مقابلے میں اپنی حیثیت میں بالکل منفرد ہے۔ بظاہر سری لنکا کے روایتی نیلے رنگ میں بنی یہ کٹ دیکھنے میں ایک عام کٹ دکھائی دے رہی ہے تاہم اس کی بناوٹی کہانی کچھ اورہے۔ سری لنکن بورڈ نے اس مرتبہ ٹیم کی کٹ میں شامل قیمض اور ٹراؤزرکو عام دھاگے سے نہیں بلکہ مخصوص قسم کے دھاگے سے تیار کیا ہے۔ سابق عالمی چمپئن ٹیم کی جرسی کی تیاری کے لیے پلاسٹک کا استعمال کیا گیا۔ ایک فلاحی ادارے ایم اے ایس نے سمندری آلودگی اور سمندری حیات کو درپیش مسائل کو اجاگر کرنے کے لیے ایک مہم چلائی جس میں ساحل پر موجود پلاسٹک استعمال شدہ تمام بوتلوں کو جمع کیا۔ ان بوتلوں کو ری سائیکل کرنے ،اس کی مدد سے دھاگہ بنایا گیا جس کے بعد اس دھاگے سے ٹیم کی جرسی تیار کی گئی۔ ادارے کی ڈائریکٹر ماحولیاتی استحکام شریکا سینانائیکے نے کہا کہ چونکہ سری لنکا ایک ساحلی ملک ہے، تاہم اس پورے ساحل کو آلودگی سے پاک کرنے کے لئے سری لنکا بحریہ اورکرکٹ بورڈ کے تعاون سے اس منصوبے کو مکمل کیا گیا۔ ہمیں امید ہے کہ اسی طرح کا قدم دیگر لوگ بھی اپنائیں گے کیونکہ یہ ایک طرح کی ضائع شدہ چیز کو قیمتی چیز بنانے کا عمل ہے۔
