جدہ ۔ 18اکٹوبر(سیاست ڈاٹ کام ) سابق عالمی فٹبال چمپیئن برازیل نے اپنی روایتی حریف اور پڑوسی ملک ارجنٹینا کو 0-1سے شکست دے کر سعودی عرب میں کھیلی جانیوالی 4 ملکی سوپرکلاسک فٹبال چمپیئن شپ کی ٹرافی جیت لی۔ میزبان سعودی عرب اور عراق کی ٹیموں نے بھی چمپیئن شپ میں حصہ لیا۔برازیل اور ارجنٹینا کی ٹیموں کی شہرت اور اہمیت کے پیش نظر جدہ کے کنگ عبداللہ اسپورٹس سٹی میں ہونے والے اس میچ کو ’’سوپر کلاسیکو‘‘ کا نام دیا گیا۔میچ کا فیصلہ انجری ٹائم کے دوران برازیلی کپتان نیمرکی جانب سے لگائے جانے والے کارنر پر میرانڈا کے گول سے ہوا۔ چمپیئن شپ کے ابتدائی 3 مقابلے ریاض میں کھیلے گئے تھے۔ دونوں ٹیموں نے عمدہ کھیل پیش کیا۔ خاص طور پر ارجنٹیناکی ٹیم جس میں لیونل میسی سمیت کئی اہم کھلاڑیوں شامل نہیں تھے مخالف ٹیم کو روکنے میں کامیاب رہی۔ اسٹار فٹبالرزکی برازیل ٹیم بڑی مشکل سے میچ کو فیصلہ کن بنا سکی۔ دفاعی کھلاڑیوں نے اس میچ کے دوران برازیلی اسٹار نیمر جونیئر کو بڑی خوبصورتی سے روکے رکھا۔کھیل کے دوران کسی مرحلے پر بھی نیمر حریف ٹیم کے لئے خطرہ نہ بن پائے۔ انجری ٹائم کے دوران 93ویں منٹ میں برازیل کو کارنر ملا۔ کارنر کک لگانے کیلئے نیمر جونیئر آئے اوران کے ساتھی کھلاڑی میرانڈا نے گول کے سامنے ملنے والی گیند کو جال تک پہنچانے میں کوئی غلطی نہیں کی۔60ہزارسے زائد تماشائی میچ دیکھنے کیلئے موجود تھے اور محسوس ہو رہا تھا میچ پنالٹی ککس پر چلا جائے گا لیکن تماشائی پنالٹی ککس کی سنسنی خیزی سے محروم رہے اور واحد گول نے برازیل کو فتح دلا دی۔یہ گول کرنے والے میرانڈا کو میچ کے28ویں منٹ میں بھی ایک موقع ملا تھا لیکن وہ کاسیمیرو کے کراس پاس کو گول میں پہنچانے میں ناکام رہے تھے۔ارجنٹینا کی ٹیم کو بھی موقع ملا لیکن اس سے فائدہ نہیں اٹھایا جا سکا۔
