قاہرہ۔20اپریل( سیاست ڈاٹ کام ) مصر کی ایک عدالت نے اخوان المسلمین کے اہم رہنما محمد البلتاجی کو ایک سال کیلئے جیل بھیج دیا ہے۔ ان پر الزم تھا کہ انہوں نے توہین عدالت کا ارتکاب کیا ہے۔ عدالتی ذرائع کے مطابق محمد مرسی کی صدارت سے برطرفی اور اخوان المسلمین کو دہشت گرد جماعت قرار دیئے جانے کے بعداخوان المسلمین کے غیر معمولی طور پر نمایاں رہنماوں میں سے کسی اخوانی رہنما کو یہ پہلی سزائے قید ہے۔ تاہم پچھلے ماہ 529 کارکنوں سمیت متعدد رہنماوں کو سزائے موت سنائی جا چکی ہے۔
محمد البلتاجی کے خلاف توہین عدالت کے اس مقدمے کے علاوہ معزول صدر محمد مرسی اور تیرہ دیگر رہنماوں کے ساتھ 2012 میں مظاہرین کو قتل پر اکسانے کے مبینہ جرم کے تحت بھی مقدمہ چلایا جا رہا ہے۔ محمد البلتاجی نے اسیکیوشن پر الزام عاید کیا تھا کہ وہ اخوان المسلمین کی قیادت کے خلاف سازش کر رہی ہے۔ عدالت نے اسے توہین قرار دیتے ہوئے محمد البلتاجی کو ایک سال کیلئے قید کی سزا سنادی ہے۔ ملک کے پہلے منتخب صدر محمد مرسی کو فوج نے 3 جولائی 2013 کو جنرل عبدالفتاح السیسی کی قیادت میں برطرف کر دیا تھا۔ تب سے اب تک معزول صدر اوراخوان المسلمین کے مرشد عام محمد بدیع سمیت اخوان کی پوری قیادت سینکڑوں کارکنوں سمیت جیلوں میں ہے۔ جبکہ سینکڑوں کارکن مختلف واقعات میں مارے جاچکے ہیں۔