اسلام آباد۔11مئی ( سیاست ڈاٹ کام ) سابق ٹسٹ کرکٹر شعیب اختر نے ورلڈ کپ 2015ء کیلئے آل راؤنڈر شاہد آفریدی کی بطور کپتان تقرری کی حمایت کردی ۔ میگا ایونٹ کے حوالے سے گفتگو کرتے ہوئے شعیب اختر کا کہنا تھا کہ ورلڈ کپ میں آفریدی کو پاکستانی ٹیم کی رہنمائی کرنی چاہیئے ۔ انہوں نے کہا کہ آفریدی بیٹسمین نہیں ہیں لیکن وہ ایک اچھے بالر ہیں اور کرکٹ میں ان کا اچھا رویہ ہے ۔ انہیں پاکستان کا کپتان بنانے کیلئے کافی ہے ۔ حال ہی میں منتخب کئے جانے والے ہیڈ کوچ
وقار یونس کے بارے میں شعیب اختر نے کہا کہ وہ ہمیشہ سے کھلاڑیوں کیلئے رول ماڈل رہے ہیں اور انہیں ڈریسنگ روم میں ایک والد کی طرح کھلاڑیوں کی دیکھ بھال کرنی چاہیئے ۔ ان کا کہنا تھا کہ ہر کھلاڑی سے نمٹنے کا مختلف طریقہ ہوتا ہے جہاں کچھ کے ساتھ احترام کے ساتھ پیش انا پڑتا ہے تو کچھ کے ساتھ سختی کرنی پڑتی ہے ۔ دوسری جانب سابق ٹسٹ کپتان محمد یوسف نے کہا کہ وقار کو کھلاڑیوں کے ساتھ اپنے چھوٹے بھائیوں کی طرح پیش آنا چاہیئے ۔کیونکہ کوچ کی جانب سے تنقید ایک کھلاڑی کے حوصولوں کو پست کرسکتی ہے ۔ انہوں نے امید ظاہر کی ہے کہ وقار ماضی کی غلطیاں نہیں دہرائیں گے اور ٹیم کی ضروریات کے مطابق فیصلے کریں گے ۔