کراچی ۔20 مئی (سیاست ڈاٹ کام )پاکستانی ٹوئنٹی20 کرکٹ ٹیم کے کپتان شاہد آفریدی کے بموجب پاکستان میں بین الاقوامی کرکٹ کی واپسی سے بہت خوشی ہورہی ہے ، زمبابوے کرکٹ ٹیم کی پاکستان آمد سے پاکستانی کرکٹ پر چھ سال سے چھائی خزاں کے بعد بہار آگئی ہے۔ میڈیا سے گفتگو کرتے ہوئے کپتان شاہد آفریدی نے کہا کہ پاکستان میں بین الاقوامی کرکٹ کی واپسی سے بہت خوشی ہے ۔انہوں نے کہا کہ پاکستان آمد پر زمبابوے ٹیم کی ہمت و جرات کی تعریف کی جانی چاہیئے جنہوں نے پاکستان آکرکرکٹ کے شائقین کو خوش کیا ہے۔ دوسری طرف گھریلو میدانوں میں پہلی مرتبہ کھیلنے والے پاکستان ونڈے ٹیم کے کپتان اظہرعلی نے کہا کہ زمبابوے ٹیم کی پاکستان آمد ان پاکستانی کھلاڑیوں کے لیے بیحدخوشی کا باعث ہے جنہوں نے اب تک گھریلو میدانوںکا مزہ نہیں لیا ہے ۔ انہوں نے کہا کہ کرکٹ شائقین اپنے کھلاڑیوں کو وطن میں کھیلتا دیکھنا چاہتے ہیں۔ زمبابوے سیریز سے نوجوان کھلاڑیوں کو تقویت ملے گی، دعا ہے کہ یہ سیریز خیریت سے کامیاب ہو تاکہ پاکستان میں بین الاقوامی کرکٹ کا راستہ کھل جائے۔
