ابوظہبی۔25 اکٹوبر (سیاست ڈاٹ کام ) پاکستان کیخلاف پہلے ٹی 20 میں کامیابی کے لئے مطلوبہ 156 رنز کے ہدف کے تعاقب میں آسٹریلیائی ٹیم 89 رنزڈھیر ہوگئی اور پاکستان نے 66 رنز کی کامیابی کے ساتھ 3 مقابلوں کی سیریز میں 1-0 کی سبقت حاصل کرلی ہے۔ ابوظہبی میں ہوئے میچ میں پاکستان نے پہلے بیٹنگ کرتے ہوئے مقررہ 20 اوورز میں 8 وکٹ پر 155 رنز بنائے۔ بابر اعظم نے ناقابل شکست 68 رنز کی اننگز کھیلی ،دیگرنمایاں کھلاڑیوں میں محمد حفیظ 39، فخر زمان 14 اور حسن علی ناٹ آئوٹ17 رنز شامل ہیں۔ آسٹریلیا کے ابتدائی دونوں کھلاڑی پہلے ہی اوور میں میدان چھوڑ گئے ،انہیں کئی ماہ بعد ٹیم میں واپسی کرنے والے عماد وسیم نے بولڈ کیا۔ مہمان ٹیم کی تیسری وکٹ گلین میکس ویل کی گری ،فہیم اشرف نے انہیں 2 کے انفرادی اسکور پر بولڈ کردیا۔ آسٹریلیا کے بین ڈورمیٹ آئوٹ ہونے والے چوتھے کھلاڑی تھے ،وہ کھاتہ کھولے بغیر ہی رن آئوٹ ہوگئے۔22 کے مجموعی اسکوپر پانچویں آئوٹ ہونے والے بیٹسمین ایلکس کیری تھے،انہیں بھی عماد وسیم نے آوٹ کیا۔آسٹریلیا کی چھٹی وکٹ بھی 22 اسکور پر گر گئی، فہیم اشرف نے کرس لن کو 14کے انفرادی اسکورپر آئوٹ کیا۔ حسن علی نے 19 رنز بنانے والے ایشٹن ایگر کو سرفراز احمد کی مدد سے آوٹ کیا۔ آسٹریلیا کی ساتویں وکٹ 60 کے اسکور پر گر گئی۔ آسٹریلیا کی آٹھویں وکٹ 72 کے اسکور پر گری،ایڈم زمپا نے اونچا اسٹروکس کھیلا، جسے حسن علی نے خوبصورت کیچ میں بدل دیا اور اس طرح میچ میں شاہین آفریدی پہلی وکٹ لینے میں کامیاب رہے۔ نویں وکٹ بھی شاہین آفریدی نے حاصل کی،انہوں نے اینڈریو ٹائی کو 6 رنز پر بولڈ کیا۔آسٹریلیا کا دسواں اور آخری کھلاڑی ناتھن کالٹرنائیل 34 رنز بناکر آؤٹ ہوئے انہیں شاداب نے پویلین کی راہ دکھائی۔ شانداربولنگ کرتے ہوئے آسٹریلیا کو شروع میں ہی مقابلے سے باہر کرنے والے بائیں ہاتھ کے اسپنر عماد وسیم کو مین آف دی میچ قراردیا گیا۔ دونوں ٹیموں کے درمیان سیریز کے باقی 2 میچز 26 اور 28 اکتوبر کو دبئی میں کھیلے جائیں گے۔ پاکستان کو آئی سی سی کی درجہ بندی میں پہلا مقام برقرار رکھنے کیلئے ایک میچ میں کامیابی درکار تھی جبکہ تیسرے نمبر پر موجود آسٹریلیا کو پہلے مقام تک رسائی کیلئے تمام میچز میں فاتح ہونا تھا ،آسٹریلیا 1۔2 سے سیریز جیت کر ہندوستان کو دوسرے مقام سے محروم کرسکتا ہے۔
