دبئی۔4 ڈسمبر (سیاست ڈاٹ کام ) انٹرنیشنل کرکٹ کونسل (آئی سی سی) کی عالمی درجہ بندی میں آسٹریلیائی ٹیم پانچویں نمبر پر موجود ہے لیکن ہندوستان کو ٹسٹ سیریز میں0۔4 سے وائٹ واش کر کے عالمی درجہ بندی میں پہلا مقام حاصل کر سکتی ہے۔ انٹرنیشنل کرکٹ کونسل کی طرف سے جاری کردہ تفصیلات کے مطابق آسٹریلیائی ٹیم کو ٹسٹ درجہ بندی میں ہندوستان کی طویل حکمرانی ختم کرنے کا موقع مل گیا، تاہم اس ہدف کے حصول کے لئے اسے ٹسٹ سیریز 0-4 سے جیتنا ہو گی۔ اس وقت ہندوستانی ٹیم عالمی درجہ بندی میں 116ریٹنگ پوائنٹس کے ساتھ سرفہرست ہے جبکہ آسٹریلیائی ٹیم 102ریٹنگ پوائنٹس کے ساتھ پانچویں نمبر پر موجود ہے۔ پاکستان اور نیوزی لینڈ کے درمیان جاری آخری ٹسٹ کے بعد آسٹریلیائی ٹیم کے موقف میں تبدیلی آسکتی ہے۔ نیوزی لینڈ کی شکست کی صورت میں آسٹریلیائی ٹیم چوتھے نمبر پر آجائے گی اور اس کے بعد ہندوستان کے خلاف کلین سوئپ سے یہ پہلے مقام پر فائز ہو سکتی ہے تاہم ہندوستان کے خلاف شکست کی صورت میں آسٹریلیائی ٹیم کو چھٹے نمبر پر تنزلی کا سامنا کرنا پڑ سکتا ہے۔ دونوں ٹیموں کے درمیان سیریز ڈرا ہونے پر ہندوستانی ٹیم کے 2 نشانات کم ہوں گے لیکن اس کے باوجود وہ پہلے مقام پر رہے گی لیکن آسٹریلیا کو وائٹ واش کر کے ہندوستانی ٹیم 120 پوائنٹس کے ساتھ اپنا پہلا مقام مزید مستحکم کر لے گی۔ آسٹریلیا اور ہندوستان کے درمیان چار ٹسٹ میچوں پر مشتمل سیریز کا آغاز 6 دسمبر کو ہو گا۔
