دبئی۔20 اکٹوبر (سیاست ڈاٹ کام) پاکستان کے خلاف ٹسٹ سیریز میں شکست کے ساتھ ہی آسٹریلیا کی ٹیم کی ٹیسٹ سیریز میں دو درجہ تنزلی ہو گئی ہے جبکہ پاکستان کی ٹیم سیریز جیتنے کے باوجود ساتویں مقام پر ہی موجود ہے۔ ابوظہبی میں کھیلے دو ٹسٹ میچوں کی سیریز کے دوسرے میچ میں پاکستان نے محمد عباس کی 10وکٹوں کی شاندار کارکردگی کی بدولت آسٹریلیا کو 373رنز کے بھاری فرق سے شکست دے کر سیریز 0-1 سے اپنے نام کر لی۔یہ پاکستانی ٹیم کی کپتان سرفراز احمد کی زیر قیادت کسی بھی ٹسٹ سیریز میں پہلی فتح ہے۔ اس شکست کے ساتھ ہی سیریز سے قبل انٹرنیشنل کرکٹ کونسل(آئی سی سی) کی عالمی درجہ بندی میں تیسرے نمبر پر موجود آسٹریلیائی ٹیم دو درجہ تنزلی کے بعد پانچویں نمبر پر پہنچ گئی ہے۔ آسٹریلیائی ٹیم کے دو ریٹنگ پوائنٹس میں بھی کمی ہوئی ہے جس کے بعد اس کے پوائنٹس کی تعداد 102ہو گئی ہے اور وہ اعشاریہ پوائنٹس کے فرق سے چوتھے نمبر پر موجود نیوزی لینڈ کے بعد پانچویں نمبر پر موجود ہے۔ دوسری جانب سیریز جیتنے کے باوجود پاکستان کی ٹیم بدستور عالمی درجہ بندی میں ساتویں نمبر پر موجود ہے لیکن اس کے پوائنٹس میں واضح بہتری آئی ہے۔ میچ اور سیریز میں کامیابی کی بدولت پاکستان نے قیمتی 7 پوائنٹس حاصل کئے ہیں جس سے ان کے پوائنٹس 88 سے 95 ہو گئے ہیں اور وہ 97 پوائنٹس کے ساتھ چھٹے نمبر پر موجود سری لنکائی ٹیم سے محض دو پوائنٹس پیچھے ہے۔ عالمی درجہ بندی میں ہندوستان 116پوائنٹس کے ساتھ بدستور پہلے نمبر پر موجود ہے جبکہ دوسرے نمبر پر موجود جنوبی افریقہ کے 106 پوائنٹس ہیں۔انگلینڈ اور نیوزی لینڈ 102 پوائنٹس کے ساتھ بالترتیب تیسرے اور چوتھے نمبر پر موجود ہیں جبکہ آسٹریلیا پانچویں ، سری لنکا چھٹے، پاکستان ساتویں اور ویسٹ انڈیز آٹھویں نمبر پر موجود ہے۔
