دبئی ۔27 اکٹوبر (سیاست ڈاٹ کام ) پاکستان نے آسٹریلیا کو دوسرے ٹی20 میچ میں 11رنز سے شکست دے کر ٹی20 سیریز اپنے نام کرنے کے علاوہ لگاتار 10ٹوئنٹی20 سیریز جیتنے والی پہلی ٹیم بننے کا اعزاز حاصل کر لیا ہے۔ دبئی میں کھیلے گئے میچ میں پاکستان نے ٹاس جیت کر پہلے بیٹنگ کا فیصلہ کیا لیکن ٹیم کی اننگز کا کچھ زیادہ اچھا نہ تھا اور فخر زمان ایک مرتبہ پھر پل شاٹ کھیلنے میں ناکامی پر 10رنز بنانے کے بعد پویلین لوٹے۔ گزشتہ میچ کی طرح ایک مرتبہ پھر محمد حفیظ اور بابر اعظم نے ذمہ دارانہ بیٹنگ کا مظاہرہ کیا اور دوسری وکٹ کے لیے 60رنز کی شراکت قائم کی۔ بلی اسٹین لیک کو چھکا لگانے کے بعد اگلی گیند پر دوبارہ اسی کوشش میں محمد حفیظ باؤنڈری پر کیچ ہوئے، انہوں نے 40رنز بنائے۔ اسکور میں ابھی 7رنز کا اضافہ ہی ہوا تھا کہ ٹیم کو بڑا نقصان اٹھانا پڑا اور بابر اعظم 45رنز بنانے کے بعد وکٹ گنوا بیٹھے۔ پاکستانی ٹیم کے بلے باز اختتامی اوورز میں بڑے شاٹ لگانے کی کوشش میں جدوجہد کرتے نظرآئے اور یکے بعد دیگرے وکٹیں گرتی رہی جس کے سبب ٹیم بڑا اسکور کرنے میں ناکام رہی۔ اننگز کے آخری اوور میں 15رنز کی بدولت پاکستان کی ٹیم مقررہ اوورز میں 6وکٹوں کے نقصان پر 147رنز بنانے میں کامیاب رہی۔ آسٹریلیا نے ہدف کا تعاقب شروع کیا تو 11 کے مجموعی اسکور پر ڈارسی شارٹ امپائر کے متنازعہ فیصلے سے رن آؤٹ ہو کر پویلین لوٹ گئے۔ اسکور 19تک ہی پہنچا تھا کہ شاداب خان کے شاندار کیچ نے کرس لن کی اننگز کا خاتمہ کردیا جبکہ ایرون فنچ بھی چھکا مارنے کی کوشش میں فخر زمان کو کیچ دے بیٹھے۔ تین وکٹیں گرنے کے بعد مچل مارش اور گلین میکسویل وکٹ پر یکجا ہوئے اور دونوں نے 30 رنزجوڑکر اسکورکو 61 تک پہنچا دیا لیکن اس سے قبل کہ یہ شراکت خطرناک ثابت ہوتی، شاداب کی گیند پر مارش کی اننگز تمام ہوئی۔ ایلکس کیری حفیظ کو وکٹ دے کر پویلین لوٹے جبکہ فخر زمان کے شاندار رن آؤٹ نے میک ڈرموٹ کو بھی واپسی پر مجبور کردیا۔ 73رنز پر چھ وکٹیں گرنے کے بعد ایسا محسوس ہورہا تھا کہ آسٹریلیا یکطرفہ مقابلے کے بعد ایک مرتبہ پھر شکست سے دوچار ہو گی لیکن اس موقع پر میکسویل ڈٹ گئے۔ انہوں نے جارحانہ بیٹنگ 52 رنز کی اننگز کھیلی۔ آسٹریلیا کی ٹیم مقررہ اوورز میں 8وکٹوں کے نقصان پر 136رنز بنا سکی ۔ عماد وسیم کو عمدہ بولنگ پر میچ کا بہترین کھلاڑی قرار دیا گیا، انہوں نے 4 اوورزمیں صرف 8رنز کے عوض 1وکٹ حاصل کی۔
