لاہور ۔25 ڈسمبر (سیاست ڈاٹ کام ) آسٹریلیائی کرکٹ ٹیم کا دورہ پاکستان پی ایس ایل کے لاہور اور کراچی کے میچز سے مشروط کر کے مجوزہ سیریز میں بھی ترمیم کردی گئی۔ کرکٹ آسٹریلیا کی سکیورٹی ٹیم اور دو سے تین عہدیدار مارچ کے پہلے ہفتے میں پی سی بی کے مہمان بنیں گے جو 17 مارچ کو پی ایس ایل کے فائنل سمیت تمام سکیورٹی صورتحال کا جائزہ لے کر اپنی رپورٹ دیں گے ، جس کی روشنی میں کرکٹ آسٹریلیا اور ان کی حکومت تمام معاملات کو قطعیت دے گی۔ ذرائع نے کہا ہے کہ پی سی بی آسٹریلیاکے بعد دیگر بڑی غیر ملکی ٹیموں کی میزبانی کیلئے بھی سرگرم ہے۔ کرکٹ آسٹریلیا حکام پاکستان ٹیم بھجوانے کا اشارہ تو دے چکے ہیں تاہم حتمی فیصلہ کرنے سے پہلے سکیورٹی حالات کی تسلی اور وقت لینا چاہتے ہیں، اس لئے میچز بھی تبدیل کئے جارہے ہیں۔ پروگرام کے مطابق باہمی سیریز پہلے 19 مارچ کو شروع ہونی تھی تاہم پی سی بی کی خواہش تھی کہ آسٹریلیائی ٹیم کراچی پہنچے ، 19 اور 21 مارچ کو یہاں میچز کھیلے لیکن اب ایک پی سی بی نے ترمیم کے بعد اس سیریز کو 31 مارچ سے کھیلے جانے کی تصدیق کی ہے۔ پہلے انڈین پریمیئر لیگ کی وجہ سے یہ سیریز 31 مارچ تک مکمل کرنے کا فیصلہ کیا گیا تھا، انڈین پریمیئرلیگ کا پہلا میچ 29 مارچ کو ہوگا تاہم اب کرکٹ آسٹریلیا نے آئی پی ایل سے دوطرفہ سیریز کو زیادہ اہم قراردیا ہے ، جس پر اب 5 ونڈے میچز کیلئے 31مارچ سے 13اپریل تک کا وقت بہتر سمجھا جارہاہے۔
