دبئی ۔ یکم اپریل (سیاست ڈاٹ کام) آسٹریلیا نے پانچ میچوں کی سیریز میں پاکستان کو تاریخ میں دوسری مرتبہ وائٹ واش کردیا۔متحدہ عرب امارات پر پاکستان کی ہوم سیریز میں پاکستانی بیٹسمینوں نے پانچ میچوں کے دوران پانچ سنچریاں بنائی لیکن ٹیم ایک بھی میچ میں کامیاب نہ ہوسکی۔ اس سے قبل آسٹریلیا 2009-10 کی پانچ میچوں کی ہوم سیریز کے دوران بھی پاکستان کو وائٹ واشن کیا تھا ۔ دبئی اسٹیڈیم پر کھیلے گئے پانچویں میچ میں آسٹریلیا نے پاکستان کو 328 رنز کا ہدف دیاجو سیریز کے دوران کسی بھی ٹیم کا 300 یا اس سے زائد کا پہلا اسکور رہا۔ بڑے ہدف کے تعاقب میں پاکستانی ٹیم حارث سہیل کی سنچری،کپتان عماد وسیم اور شان مسعود کی نصف سنچریوں کی بدولت مقررہ 50 اوورز میں 7 وکٹ پر 307 رنز تک محدود رہی اور اسے 21 رنز کی شکست برداشت کرنی پڑی۔آسٹریلیا کے 328 رنز کے ہدف کے تعاقب میں شان مسعود اورگزشتہ میچ میں سنچری بنانے والے عابد علی نے اننگز کا آغاز کیا تاہم 1رنز کے مجموعی اسکور پر عابد علی بغیر کوئی رنز بنائے،بیرینڈوف کا شکار بن گئے۔ دوسری وکٹ پر شان مسعود اور حارث سہیل نے اسکور میں 108رنز کا اضافہ کیا،پاکستان کے دوسرے اوپنرکو50 کے انفرادی اسکور پر زمپا نے پویلین کی راہ دکھائی۔ تیسری وکٹ 136 کے اسکور پر گری،گزشتہ میچ سمیت سیریز میں دوسنچریاں بنانے والے محمد رضوان اس مرتبہ صرف 12 رنز بناکر میکس ویل کو اپنی وکٹ تھما بیٹھے۔چوتھی وکٹ پر حارث سہیل اور عمر اکمل نے 102رنز کی شراکت قائم کی، 238 کے اسکور پر عمر اکمل 43 رنز کی اننگز کھیل کر لائن کا شکار بن گئے۔ پاکستان کے پانچویں آوٹ ہونے والے بیٹسمین میچ کے ٹاپ اسکور حارث سہیل تھے جو 130 رنز کی عمدہ اننگز کھیل کر رچرڈسن کی گیند پر آوٹ ہوئے۔ چھٹی وکٹ 255 کے اسکور پر سعد علی کی گری جو صرف 4 رنز بناسکے، انہیں بیرینڈوف نے آوٹ کیا۔ اہم ترین وکٹیں گر جانے کے پریشر عماد وسیم پر بڑھ گیا،انہوں نے کئی اچھے اسٹروک کھیلے اپنی نصف سنچری بھی مکمل کی تاہم ٹیم کو فتح سے ہمکنار نہ کراسکے،وہ 50 رنز کے ساتھ ناقابل شکست رہے۔آسٹریلیا کے بیرینڈوف نے 3 جبکہ لائن، زمپا، میکس ویل اور رچرڈسن نے فی کس1 وکٹ اپنے نام کی۔سیریز کے دوران پاکستان کے حارث سہیل اور محمد رضوان نے فی کس 2 جبکہ عابد علی نے ایک سنچری اسکور کی۔ آسٹریلیائی کپتان نے پانچ میچوں کے دوران 2 سنچریاں بنائی جبکہ میکس ویل اور عثمان خواجہ نروس نائینٹیز کا شکار رہے۔
