آسٹریلیا اور انگلینڈ کی سیمی فائنلز میں رسائی

بھوبھنیشور۔13 ڈسمبر(سیاست ڈاٹ کام ) مینز ہاکی ورلڈ کپ میں انگلینڈ اور آسٹریلیا سیمی فائنل میں اپنی جگہ بنانے میں کامیاب ہوگئے۔ بھوبھنیشور میں کھیلے جا رہے 14ویں ورلڈ کپ کے پہلے کوارٹر فائنل میں انگلش ٹیم نے ارجنٹیناکو 2-3 سے شکست دی۔ارجنٹینا اور انگلینڈ کے مابین دلچسپ مقابلہ رہا۔ ارجنٹینا نے پہلے کوارٹر میں ہی گول کرکے برتری حاصل کی جسے چند منٹ بعد ہی انگلینڈ کی ٹیم نے برابر کردیا۔دوسرے کوارٹر میں انگلش ٹیم نے دوسرا گول کرکے حریف ٹیم پر برتری حاصل کرلی۔ انگلینڈ کی جانب سے فیصلہ کن گول آخری کوارٹر میں کیا گیا اور اس نے 2-3 سے کامیابی حاصل کرکے ایونٹ کے سیمی فائنل کے لئے کوالیفائی کرلیا۔ دوسرے کوارٹر فائنل میچ میں آسٹریلیا نے فرانس کو 3-0 گول سے شکست دی۔آسٹریلیا کی جانب سے جیریمی ہیورڈ، بلیک گووورز اور ایرن زیلسکی نے گول اسکور کئے۔