l ہندوستان کی کرکٹ طاقت میں بے انتہا اضافہ
l آئی سی سی کا وجود خطرہ میں
لندن ۔20 اپریل (سیاست ڈاٹ کام) انڈین پریمیئر لیگ (آئی پی ایل) کے سابق چیرمین للت مودی نے بین الاقوامی کرکٹ کا مستقبل خطرے میں قرار دیتے ہوئے پیش قیاسی کی ہے کہ آنے والے وقتوں میں کھلاڑی ایک میچ سے ایک ملین ڈالرس تک کمائیں گے جس سے عالمی مقابلوں کی اہمیت دم توڑ جائے گی اور مختلف ملکوں کے درمیان روایتی مقابلے بالکل ختم ہو جائیں گے۔10 سال قبل للت مودی کی سربراہی میں انڈین پریمیئر شروع کیا گیا تھا اور دیکھتے ہی دیکھتے یہ دنیا بھر کے کرکٹ شائقین کی توجہ کا محور بن گیا اور اس وقت ہر لحاظ سے دنیا کی سب سے بڑی اور مہنگی لیگ ہے۔ برطانوی اخبار ٹیلی گراف سے گفتگو کرتے ہوئے للت مودی نے کہا کہ آئی پی ایل اپنی جگہ برقرار رکھے گی اور دنیا کی سب سے بااثر لیگ میں سے ایک ہو گی۔آئی پی ایل کی ٹیموں کے مالکان ہندوستان کی چند بڑی کاروباری شخصیات اور بالی ووڈ کے ستارے ہیں جنہوں نے ایک ارب سے زائد آبادی کے ملک میں کرکٹ کے جوش و جذبے کو دیکھتے ہوئے اس میں بھرپور سرمایہ کاری کی جس کی بدولت آج یہ دنیا کی مہنگی ترین لیگ ہے اور دنیا بھر کے اسپانسرز اور براڈ کاسٹرز کی توجہ کا مرکز ہے۔لیگ میں کھلاڑیوں کو دنیا کی کسی بھی کرکٹ لیگ کی نسبت بھاری معاوضہ دیا جاتا ہے جس کی تازہ مثال انگلینڈ کے آل راؤنڈر بین اسٹوکس ہیں جن کی خدمات راجستھان رائلز نے 1.95 ملین ڈالرز میں حاصل کی ہیں۔آئی پی ایل میں ایک ٹیم زیادہ سے زیادہ 12ملین ڈالر کھلاڑیوں کے معاوضے کی مد میں خرچ کر سکتی ہے لیکن مودی کا ماننا ہے کہ اگر یہ پابندی ہٹا دی جائے تو کرکٹرز اتنا معاوضہ حاصل کریں گے جتنا انگلش پریمیئر لیگ کے فٹبالر یا امریکہ کی نیشنل فٹبال لیگ کے کھلاڑی حاصل کرتے ہیں۔انہوں نے کہا کہ اس کے کھیل پر بہت زیادہ اثرات مرتب ہوں گے کیونکہ پھر کھلاڑی ملک کی نمائندگی کرنے کے بجائے انڈین پریمیئر لیگ کھیل کر اپنی قسمت بدلنے کو ترجیح دیں گے۔انہوں نے پیش قیاسی کہ آپ دیکھیں گے کہ کھلاڑی کو ایک میچ کے عوض 1 تا 2 ملین ڈالرز ملیں گے اور یہ بہت جلد ہو گا۔ اگر بولی کے عمل کو فری مارکیٹ کر دیا جائے تو جس کے پاس زیادہ پیسا ہو گا وہی جیتے گا اور کھلاڑی اس ٹیم کی طرف کھنچتے چلے جائیں گے جو زیادہ تنخواہ دے گی۔جان کو لاحق خطرات کے سبب لندن میں مقیم ہونے والے مودی نے مزید کہا کہ گزرتے وقت کے ساتھ مختلف ملکوں کی ٹیموں کے درمیان مقابلے ختم ہو جائیں گے جس کے ساتھ ہی کھیل کی عالمی گورننگ باڈی انٹرنیشنل کرکٹ کونسل (آئی سی سی) بھی ختم ہو جائے گی۔ان کا ماننا ہے کہ آج کے دور میں بین الاقوامی کرکٹ کی کوئی اہمیت نہیں۔ ہندوستانی شائقین کی نظر میں اس کی قیمت صفر ہے۔ کل آپ دیکھیں گے کہ دوطرفہ کرکٹ ختم ہو جائے گی اور بڑی سیریز ورلڈ کپ کی طرح ہر 3 یا 4 سال بعد ہوں گی۔للت مودی نے کہا کہ آئی سی سی ایک غیرمتعلقہ باڈی ہو گی جس کے پاس کوئی طاقت نہ ہو گی۔ اگر مستقبل میں انہوں نے ہندوستان کی جانب سے آئی پی ایل کی ممکنہ توسیع پر ان کو انٹرنیشنل کرکٹ کونسل سے باہر نکالنے کی دھمکی دی تو ہندوستان کے پاس اتنی طاقت ہو گی کہ وہ اپنے پیروں پر کھڑا ہو سکے۔ ان کے پاس ایک ڈومیسٹک لیگ ہے جس کا حجم عالمی کرکٹ سے 20 گنا بڑا ہے۔انہوں نے کہا کہ ٹسٹ کرکٹ کو بچانے کا واحد طریقہ صرف یہ ہے کہ اگر آئی سی سی ایک عرصے سے زیر بحث چیمپیئن شپ کو متعارف کرا دے اور تمام ٹیمیں مل کر اسے ایک ٹورنمنٹ کی شکل دے دیں۔تاہم مودی نے خبردار کیا کہ اگر آئی سی سی ایسا کرنے میں ناکام رہتی ہے تو کوئی وجہ نہیں انڈین پریمیئر لیگ اپنی ناک آؤٹ ٹسٹ چیمپیئن شپ متعارف کروا دے۔بی سی سی آئی نے للت مودی کو آئی پی ایل انتظامیہ میں بے ضابطگیوں کے 8 الزامات عائد کیے ہیں اور لندن میں مقیم سابق آئی پی ایل چیئرمین 2009 سے ہندوستان نہیں آئے ہیں جہاں ان کا مستقل اصرار ہے کہ وطن لوٹنے کی صورت میں انڈرورلڈ مافیا انہیں قتل کر دے گا۔
