لکھنؤ، 21 مئی (سیاست ڈاٹ کام) ہند۔ پاک کرکٹ سیریز کے حوالے سے مزید برف 15 جون کے بعد پگھلے گی، بی سی سی آئی کے سکریٹری انوراگ ٹھاکر کہتے ہیں کہ پی سی بی متحدہ عرب امارات (یو اے ای) میں مقابلوں کا انعقاد چاہتا ہے، اور حتمی فیصلہ سے قبل کچھ امور کا طے کیا جانا ضروری ہے۔ چیرمین پاکستان کرکٹ بورڈ شہریار خان نے گزشتہ دنوں ہندوستان کا دورہ کیا جس میں باہمی سیریز کے ڈسمبر میں انعقاد پر اتفاق ہوگیا۔ حکومت ہند کی جانب سے اس سلسلے میں ’گرین سگنل‘ بھی مل چکا۔ اس کے باوجود بی سی سی آئی کی جانب سے حتمی فیصلہ سامنے نہیں آرہا۔ اب سکریٹری ٹھاکر کہتے ہیں کہ اس سیریز کے حوالے سے بات چیت 15 جون کے بعد شروع ہوگی۔ انہوں نے کہا کہ پاکستان کرکٹ بورڈ نے سیریز کے کسی تیسرے مقام یعنی یو اے ای میں انعقاد کی تجویز دی ہے، مگر کسی بھی حتمی فیصلے پر پہنچنے سے قبل بی سی سی آئی اور پی سی بی کے درمیان کچھ امور کا طے پانا ضروری ہے۔ ’’ہم یہ معاملات حل کرنے کی کوشش کر رہے ہیں۔‘‘ ٹھاکر نے مزید کہا کہ بی سی سی آئی کی جانب سے سیریز کی منظوری دینے کے بعد حکومت ہند، پاکستان کے ساتھ کرکٹ تعلقات کی بحالی کے بارے میں حتمی فیصلہ کرے گی۔ یاد رہے کہ گزشتہ دنوں وزیر اسپورٹس سربانندا سونوال نے کہا تھا کہ دوستی اور تعلقات میں بہتری کی خاطر ہم اس سیریز کے حق میں ہیں۔ دریں اثناء ٹھاکر سے آئی سی سی کے افشا ہونے والے خط کے بارے میں بھی سوال کیا گیا جس میں مبینہ طور پر الزام لگایا گیا کہ وہ کسی سٹے باز سے ملتے جلتے رہے ہیں۔ اس پر انھوں نے کہا کہ ’’میں اس خط کا جواب دے چکا اور ساتھ میں ان مشکوک افراد کی فہرست دینے کا بھی تقاضہ کیا، جن سے بی سی سی آئی عہدے داروں کو میل جول نہیں رکھنا چاہئے‘‘۔
