ہندوستان سے ٹسٹ سیریز ، اینڈرسن کی پہلے مقام پر واپسی

ربادا ٹسٹ درجہ بندی میں پہلے مقام سے محروم
دبئی۔25 جولائی (سیاست ڈاٹ کام ) دیمتھ کرونارتنے انٹرنیشنل کرکٹ کونسل کی تازہ ترین ٹسٹ درجہ بندی میں سرفہرست سری لنکائی بیٹسمین بن گئے، انہوں نے دنیش چندی مل کو پیچھے چھوڑتے ہوئے یہ اعزاز حاصل کیا، گونا تھلیکا 36 اور تھیونس ڈی بروئن 43 درجے لمبی چھلانگ لگا کر بالترتیب 73ویں اور 105ویں مقامات پر آگئے۔ بولروں کی درجہ بندی میں انگلینڈ کے جیمز اینڈرسن نے جنوبی افریقہ کاگیسوربادا کو پہلے مقام سے محروم کر دیا۔ سری لنکا کے خلاف بہتر مظاہرہ کرنے والے افریقی اسپنرکیشو مہاراج ترقی پا کر دوبارہ ٹاپ ٹوئنٹی میں شامل ہو گئے جبکہ ڈیل اسٹین 5 درجے تنزلی کے بعد ٹاپ ٹوئنٹی سے باہر ہو گئے۔ آئی سی سی کی طرف سے جاری کردہ تازہ ترین ٹسٹ درجہ بندی میں بیٹسمینوں میں آسٹریلیا کے اسٹیون اسمتھ سرفہرست ہیں، ہندوستانی کپتان ویراٹ کوہلی دوسرے، جوروٹ تیسرے نمبر پر ہیں،کرونارتنے افریقہ کے خلاف ٹسٹ سیریز میں شاندار کارکردگی کا مظاہرہ کرنے کے بعد 3 درجے ترقی کے ساتھ ساتویں نمبر پر آ گئے ہیں۔ ڈین ایلگر ایک اور ایڈن مارکرم 3 درجے تنزلی کے بعد نویں اور دسویں نمبر پر چلے گئے۔ ہاشم آملہ کی بھی تین درجے تنزلی ہوئی ہے، گونا تھلیکا نے 36 درجے ترقی کے ساتھ 73واں مقام سنبھال لی، جنوبی افریقہ کے تھیونس ڈی بروئن 43 مقامات چڑھ کر105ویں مقام پر آ گئے۔ جنوبی افریقی بولر ربادا سری لنکا کے خلاف ٹسٹ سیریز میں ناقص کارکردگی کا مظاہرہ کرنے کی وجہ سے پہلے مقام سے محروم ہو گئے ان کی جگہ جیمز اینڈرسن نے پہلا مقام سنبھال لی۔ رنگانا ہیراتھ آٹھویں مقام پر برقرار ہیں۔کیشو مہاراج 5 درجے ترقی پا کر 18ویں نمبر پر آ گئے جبکہ ڈیل اسٹین 5 درجے تنزلی کے بعد24 ویں نمبر پر چلے گئے۔ دلروون پریرا 2 درجے بہتری کے ساتھ 23ویں، دانن جایا 16 درجے ترقی کے ساتھ کیریئر میں بہترین 39ویں نمبر پر آگئے۔

روٹ نے 5 رنز دیکر 4 وکٹیں لی
لندن۔25 جولائی (سیاست ڈاٹ کام )انگلش ٹسٹ ٹیم کے کپتان جوئے روٹ بنیادی طور پر بہترین بیٹسمین ہیں تاہم انہوں نے بولنگ میں بھی جادو جگادیا ہے اور یارک شائر کی نمائندگی کرتے ہوئے انہوں نے 5 رنز دیکر 4 وکٹیں حاصل کیں اوراپنی ٹیم کی 118 رنزکی فتح میں اہم کردار ادا کیا۔روٹ کی یہ کیرئیر میں بہترین بولنگ بھی ہے ۔