برسبین ۔22 نومبر (سیاست ڈاٹ کام ) آسٹریلیا کے خلاف پہلے ٹی ٹوئنٹی میں ہندوستان کے کپتان ویراٹ کوہلی نے ہم منصب آرون فنچ کا کیچ چھوڑدیاجس پر وہ تنقید کا نشانہ بن گئے ہیں۔ ناقص فیلڈنگ اورکیچ چھوڑنے پر جہاں کپتان تنقید کا نشانہ بن گئے وہیں میچ آسٹریلیا نے ڈرک ورتھ لوئس نظام کے تحت 4 رن سے جیت لیا ۔ آسٹریلیائی ٹیم کی بیٹنگ کے دوران بارش کے باعث میچ کو 17 اوورز تک محدود کیا گیا تو اس وقت تک میزبان ٹیم نے 4 وکٹوں کے نقصان پر 158 رنز بنائے تھے۔ ڈک ورتھ لوئس نظام کے تحت ہندوستان کو میچ جیتنے کے لئے 174 رنز کا ہدف ملا جس کے جواب میں بیٹسمینوں نے جارحانہ انداز اپنایا اور مقررہ 17 اوورز میں 7 وکٹوں کے نقصان پر 169 رنز بنائے۔ مقابلے کے نتیجہ سے قطع نظرکوہلی نے کرکٹ کے مداحوں کو مایوس کر کے بہت بڑی غلطی کر ڈالی۔سوشل میڈیا پر ناقدین کی لائن لگ گئی ہے۔ ایک مداح نے تو کوہلی کو کوہلی ماننے سے انکار ہی کر دیا اور اور کہا کہ کوہلی سے اس طرح کی فیلڈنگ کی امید نہیں تھی۔ ایک نے کہا کہ یہ کوہلی کا کھیل کے میدان میں ایک مایوس کن اورخوفناک دن ہے۔
