پرتھ ۔16 ڈسمبر (سیاست ڈاٹ کام ) پرتھ میں رواں ہند۔آسٹریلیا دوسرا ٹسٹ تیسرے دن کے اختتام پر ہی دلچسپ مرحلے میں داخل ہوچکاہے جیسا کہ میزبان ٹیم نے اپنی دوسری اننگز میں 4 وکٹوں کے نقصان پر 132 رنز اسکو رکرلئے ہیں جبکہ پہلی اننگزمیں اسے ہندوستان کے خلاف 43 رنز کی سبقت حاصل ہوئی تھی اور اسطرح مقابلے میں اسے اب مجموعی طور پر 175 رنز کی سبقت حاصل ہوگئی ہے جبکہ اس کی مزید 6 وکٹیں باقی ہیں۔تیسرے دن کے ہیرو ہندوستانی کپتان ویراٹ کوہلی رہے ۔کوہلی کی سنچری جتنی شاندار رہی اتنا ہی ان کا آوٹ ہونا متنازعہ رہا۔ کوہلی کے آوٹ ہونے کے معاملے سے پھر میدانی امپائرکے فیصلے پر سوال اٹھنے لگے ہیں جومتنازعہ معاملوں میں تھرڈامپائر کی صلاح کے بغیر ہی آوٹ دے دیتے ہیں۔ ہندوستان پانچ وکٹ پر 251 رن بناکر کافی مضبوط موقف میں تھا اور ایسا محسوس ہو رہا تھا کہ وہ پہلی اننگز میں سبقت حاصل کرلے گا لیکن میچ کا رخ پلٹ گیا۔ لنچ سے ایک اوور پہلے پیٹ کمنس کی گیند کوہلی کے بیٹ کا باہری کنارہ لے کر دوسری سلپ میں پیٹر ہنڈس کامب کے ہاتھوں میں چلی گئی۔ہینڈس کامب نے نیچے غوطہ لگاتے ہوئے زمین سے چھوتا ہوا کیچ لیا جو واضح نہیں تھا لیکن امپائر کمار دھرم سینا نے فوراً آوٹ کا اشارہ دیا اور پھر تیسرے امپائر کی مدد مانگی۔ تھرڈ امپائر نائزل لانگ بھی کشمکش میں رہے اور میدان امپائر کا فیصلہ تبدیل نہیں کرسکے ۔ کوہلی کو آوٹ ہوکر پویلین لوٹنا پڑا لیکن ناراضگی ان کے چہرے پر صاف دکھائی دے رہی تھی اور باونڈری لائن پار کرتے ہی انہوں نے اپنا ہیلمٹ پھینک دیا۔ انہوں نے مداحوں کا استقبال بھی تسلیم نہیں کیا۔ ان کے آوٹ ہوتے ہی ہندوستان کی آسٹریلیا کے 326 کے اسکور تک پہنچنے کی امیدیں ٹوٹ گئیں اور پوری ٹیم لنچ کے بعد283 پر سمٹ گئی۔ہندوستان نے کل تین وکٹ پر 172 رن سے آگے کھیلنا شروع کیا۔ کپتان کوہلی نے82 اورنائب کپتان اجنکیا رہانے نے51 سے اپنی اننگز کو آگے بڑھایا۔ ہندوستان نے دن کے پہلے اوور میں ہی رہانے کو گنوا دیا۔ آف اسپنر ناتھن لیون نے رہانے کو وکٹ کیپر ٹیم پین کے ہاتھوں کیچ آوٹ کرایا۔ رہانے اسکور میں کوئی اضافہ نہیں کرسکے اور ہندوستان نے اپنا چوتھا وکٹ 173 کے اسکور پر گنوایا۔ کوہلی نے نوجوان ہنوما وہاری کے ساتھ پانچویں وکٹ کے لئے 50 رنزکی ساجھیداری کی۔ وہاری کو جوش ہیزل ووڈ کی گیند پر پین نے آوٹ کیا۔انہوں نے46 گیندوں میں20 رنز بنائے ۔ لنچ کے بعد کے کھیل میں وکٹ کیپر رشبھ پنت نے 50 گیندوں میں دوچوکوں اور ایک چھکے کی مدد سے 36 رن بنائے ۔ لیون نے ایشانت شرما، پنت اور جسپریت بمراہ کے وکٹ حاصل کرکے ہندوستانی اننگز کو سمیٹ دیا۔ لیون نے34.5 اوورمیں67 رنز پر پانچ وکٹ جبکہ میچل اسٹارک79 رنز پر دو وکٹ اور ہیزل ووڈ نے66 رنز پر دو وکٹ حاصل کئے ۔آسٹریلیا کی دوسری اننگز میں آرون فنچ (25) ریٹائرڈ ہرٹ ہوئے جبکہ مارکس ہیرس 20 رنز بنانے کے بعد جسپریت بمراہ کی گیند پر آوٹ ہوئے ۔ محمدسمیع نے شان مارش کو وکٹ کے پیچھے پنت کے ہاتھوں کیچ آوٹ کروایا اور ہینڈس کامب کو ایشانت نے ایل بی ڈبلیو کیا۔ ٹریوس ہیڈ کا کیچ ایشانت نے شامی کی گیند پر لیا۔مارش نے پانچ، ہینڈس کامب نے 13 اور ہیڈ نے 19 رن بنائے ۔دن کے اختتام پر عثمان خواجہ 41 اور پین آٹھ رن بناکر کریز پر موجود تھے ۔ سمیع نے 23 رن پر دو وکٹ جبکہ ایشانت اور بمراہ کو فی کس ایک وکٹ ملی۔
