نئی دہلی۔ 19 ڈسمبر (سیاست ڈاٹ کام)آسٹریلیا کے سابق بولر میچل جانسن نے پرتھ ٹسٹ کے دوران ہندوستانی کرکٹ ٹیم کے کپتان ویراٹ کوہلی کے رویے پر تنقید کرتے ہوئے اسے توہین آمیز قرار دیا۔آسٹریلیا کے کئی ٹی وی چینلوں پر ماہر کے طور پر پیش ہونے والے جانسن نے آسٹریلیا اور ہندوستان کے درمیان پرتھ میں کھیلے گئے دوسرے ٹسٹ کا ذکر کرتے ہوئے کہا کہ جب میچ کے بعد دونوں ٹیموں کے کپتان ہاتھ ملا رہے تھے تب کوہلیکا رویہ اورپین کے تئیں ان کے تاثرات توہین آمیز تھے ۔ جانسن نے اپنے ایک کالم میں لکھا ہے کہ ویراٹ کا برتاؤ ٹم پین کے تئیں ٹھیک نہیں تھا، آسٹریلیائی کپتان سے انہوں نے صحیح طریقے سے ہاتھ نہیں ملایا اور اس دوران ان کی آنکھوں کی طرف دیکھا بھی نہیں۔ میرے لئے یہ کافی توہین آمیز ہے ۔آسٹریلیا کے سابق کپتان نے لکھا کہ ویراٹ کئی کھلاڑیوں کے ساتھ ایسا کرتے ہیںکیونکہ وہ کوہلی ہیں اور زیادہ تر میچوں میں انہیں اہمیت دی جاتی ہے لیکن اس میچ میں وہ بیوقوف ثابت ہوئے ۔ ہندوستان کو آسٹریلیا نے اس میچ میں146 رنز سے شکست دے کر چار میچوں کی سیریز میں1-1 سے برابر کی تھی۔ اس میچ میں کوہلی اور پین کے درمیان کئی مرتبہ زبانی لڑائی بھی ہوئی جس کی وجہ سے امپائر کو درمیان میں مداخلت کرکے کپتانوں کو خبردار کرنا پڑا تھا۔اس سے قبل بالی ووڈ کے سینئر اداکار نصیرالدین شاہ نے بھی کوہلی کے رویے کو سب سے خراب بتاتے ہوئے ان پر تنقید کی تھی۔ انہوں نے سوشل میڈیا پر کہا کہ کوہلی دنیا کے سب سے خراب برتاؤ والے کرکٹر ہیں جو کافی مغرور ہیں۔ بالی ووڈ اداکار نے کوہلی پر طنز کرتے ہوئے یہ بھی لکھا تھا کہ وہ کوہلی کے خلاف اس طرح کا بیان دینے کے باوجود ملک چھوڑنے والے نہیں ہیں۔واضح رہے کہ کچھ عرصے پہلے کرکٹ کے ایک پرستار نے کوہلی کے ٹوئٹر پر لکھا تھا کہ انہیں آسٹریلیا اور انگلینڈ کے بیٹسمین پسند ہیں جس پر کوہلی نے اس پرستار کو ملک چھوڑنے کا مشورہ تک دے ڈالا تھا۔
