نئی دہلی۔25 ستمبر (سیاست ڈاٹ کام ) صدرہند رام ناتھ کووند نے ہندوستانی کرکٹ ٹیم کے کپتان ویراٹ کوہلی اور عالمی چمپئن خاتون ویٹ لفٹر میرا بائی چانو کو راشٹر پتی بھون میں منعقد قومی کھیل ایوارڈ تقریب میں ملک کے سب سے باوقار کھیل اعزاز راجیو گاندھی کھیل رتن اور20 کھلاڑیوں کو ارجن ایوارڈ سے نوازا۔ایشیائی کھیلوں کی وجہ قومی کھیل ایوارڈ تقریب کو اس مرتبہ اس کے باقاعدہ دن29 اگست سے آگے بڑھاکر25 ستمبر کو منعقد کیا گیا۔ تقریب میں مرکزی وزیر کھیل راجیہ وردھن سنگھ راٹھور موجود تھے ۔ سب سے پہلے میرا بائی چانو کو کھیل رتن پیش کیا گیا اور ان کے بعد کوہلی کھیل رتن بنے ۔وراٹ صدر کے ہاتھوں کھیل رتن کے ساتھ سچن تندولکر(1997) اور مہندر سنگھ دھونی (2007) کے بعد کھیل رتن حاصل کرنے والے تیسرے کرکٹر بن گئے ۔ تینوں فارمیٹ میں ہندستانی کپتان کوہلی کے نام کی 2016 میں بھی بحث ہوئی تھی لیکن انہیں تب منتخب نہیں کیا گیا تھا لیکن اس بار وہ تیسرے کھیل رتن کرکٹر بن گئے ۔ کوہلی کی موجودگی سے اس بار ایوارڈ تقریب کا رونق بڑھ گئی۔ کوہلی کی بیوی اور مشہور فلم اداکارہ انوشکا شرما بھی تقریب میں موجود تھیں اور وہ اگلی قطار میں بیٹھی تھیں۔ گزشتہ سال ویٹ لفٹنگ عالمی چمپئن شپ میں 48 کلو گرام کلاس میں گولڈ میڈل جیتنے والی 24 سالہ میرا بائی چانو بھی کھیل رتن بن گئیں۔ میرا بائی نے اس سال دولت مشترکہ کھیلوں میں بھی گولڈ میڈل جیتا تھا۔ اگرچہ چوٹ کی وجہ سے وہ 18 ویں ایشیائی کھیلوں میں حصہ نہیں لے پائی تھیں۔دولت مشترکہ اور ایشیائی کھیلوں میں شاندار کارکردگی دکھانے والے کئی کھلاڑیوں کو اس بار ارجن ایوارڈ کے لئے منتخب کیا گیا۔ ایشیائی کھیلوں میں ہندوستانی علمبردار اور بھالا پھینک کھلاڑی نیرج چوپڑا اور دولت مشترکہ اور ایشیائی کھیلوں میں کل پانچ میڈل جیتنے والی ٹیبل ٹینس کھلاڑی منیکا بترا سمیت 20 کھلاڑیوں کو ارجن ایوارڈ پیش کیا گیا۔ایوارڈ تقریب میں پیرا کھلاڑی انکر دھاما (پیرا ایتھلیٹکس) اور منوج سرکار (پیرا بیڈمنٹن) نے جب صدر کے ہاتھوں اپنا ارجن ایوارڈ قبول کیا تو تقریب ہال کافی دیر تک تالیوں کی گڑگڑاہٹ سے گونجتا رہا۔ عالمی چمپئن شپ میں گولڈمیڈل جیتنے والے ڈبل ٹریپ شوٹر انکر متل، ٹینس اسٹار روہن بوپنا اور گولف سنسنی شبھنکر شرما بھی ارجن ایوارڈ کے فاتحین میں شامل تھے ۔ بی سی سی آئی نے 2016 اور2017 میں بھی کوہلی کے نام کی سفارش کی تھی لیکن 2016 میں ساکشی ملک، پی وی سندھو اور دیپا کرماکر کی ریو اولمپکس میں شاندار کارکردگی کی وجہ سے وہ اس اعزاز کے لئے نہیں منتخب گئے تھے ۔ گزشتہ سال ہاکی کھلاڑی سردار سنگھ اور پیرا کھلاڑی دویندر جھجھریا کو یہ ایوارڈ دیا گیا تھا۔ کوہلی نے کھیل رتن ایوارڈ سے پہلے پدم شری ایوارڈ (2017) حاصل کیا ہے ۔صدر نے ان کے علاوہ درون اچاریہ اور دھیان چند ایوارڈ، قومی کھیل حوصلہ افزائی ایوارڈ، مولانا ابوالکلام آزاد (ایم اے کے اے ) ٹرافی اور تینجنگ نورگی قومی جرات ایوارڈ بھی پیش کئے ۔راجیو گاندھی کھیل رتن ایوارڈ حاصل کرنے والے کو میڈل اور سرٹیفکٹ کے علاوہ 7.5 لاکھ روپے کا نقد انعام دیا گیا۔ ارجن، درون آچاریہ اور دھیان چند ایوارڈ حاصل کرنے والے کھلاڑیوں کو ٹرافی ، سرٹیفکیٹ اور پانچ لاکھ روپے کے نقد انعامات دیے گئے ۔
