شارجہ ۔ 23 اپریل ۔ ( سیاست ڈاٹ کام ) انڈین پریمیئر لیگ کے جاریہ سیزن کے نویں میچ میں کنگز الیون پنجاب نے سن رائزرس حیدرآباد کو 72 رنز سے شکست فاش دیدی اور اس طرح پنجاب کی ٹیم نے مسلسل تیسری کامیابی حاصل کی ہے۔ منگل کو یہاں پنجاب نے پہلے بیٹنگ کرتے ہوئے مقررہ 20 اوورس میںچھ وکٹوں کے نقصان پر 193 رن بنائے جس میں گلین میکسویل کے شاندار 95 رنز شامل ہیں۔ انھوں نے پانچ چوکے اور نو چھکّوں کی مدد سے 43 گیندوں پر جارحانہ اننگز کے ذریعہ اپنی ٹیم کو بڑا سکور کرنے میں مدد کی۔
194 رنز کے ہدف کے تعاقب میں حیدرآباد کا آغاز اچھا نہیں رہا اور شروع سے ہی اس کی وکٹیں گرنی شروع ہوئی تو پھر یہ سلسلہ آخر تک جاری رہا۔ حیدر آباد کے بلے بازوں کے درمیان کوئی اچھی شراکت نہیں ہو پائی اور اس طرح پوری ٹیم 20 ویں اوور کی دوسری گیند پر 121 رنز بنا کر آؤٹ ہوگئی۔ ٹیم کی طرف سے آرون فنچ 19 اور لوکیش راہل 27 رنز کے ساتھ نمایاں رہے۔ اس کے علاوہ دیگر بلے باز کوئی خاص کارکردگی کا مظاہرہ نہ کر سکے۔ قبل ازیں حیدر آباد نے ٹاس جیت کر پہلے فیلڈنگ کا فیصلہ کیا تھا ۔ آئی پی ایل کے اس سیزن میں پنجاب کی یہ مسلسل تیسری جیت ہے۔ پہلے میچ میں اس نے چینائی کو اور دوسرے میں راجستھان کو شکست دی تھی۔ دوسری طرف حیدرآباد کی یہ مسلسل دوسری شکست ہے۔