لندن، 21 مئی (سیاست ڈاٹ کام) انگلینڈ کے ایک امیچر بیٹسمن ’نو بال‘ پر گیند کو ہاتھ لگا دینے پر آئوٹ دئیے جانے والے تاریخ کے پہلے بلے باز بن گئے۔ ایک برطانوی اخبار نے بتایا کہ 35 سالہ برائن ڈربی شائر گزشتہ روز ہمپشائر میں لیمنگٹن کیلئے بیٹنگ کر رہے تھے جب امپائر نے بولر کو کریز سے باہر نکل کر گیند پھینکنے پر ’نو بال‘ کا اشارہ دیا۔ برائن نے شاٹ کھیلنے کی کوشش کی لیکن گیند ان کے بیاٹ سے پوری طرح نہیں ٹکرائی۔ اس پر برائن نے گیند اٹھا کر ایک فیلڈر کی جانب اچھال دی، جس پر فیلڈنگ ٹیم نے اپیل کی اور امپائر نے بیٹسمن آئوٹ قرار دے دیا۔ میریلبون کرکٹ کلب (ایم سی سی) کے کرکٹ قوانین کے فقرہ 33 کے تحت برائن کو گیند اٹھا کر دینے سے پہلے کسی بھی فیلڈر سے اجازت لینا ضروری تھا۔ ’نو بال‘ پر بلے باز بولڈ، کیچ یا پھر ایل بی ڈبلیو تو نہیں ہو سکتا، تاہم گیند اٹھانے، گیند کو دو مرتبہ ہٹ لگانے، فیلڈنگ میں مداخلت یا پھر رن آوٹ ہو سکتا ہے۔ ایم سی سی کرکٹ قوانین کے مشیر مارک ویلئمز نے بتایا کہ ’نو بال‘ سے متعلق قانون 24 کے فقرہ 16 کے تحت تاریخ میں پہلی مرتبہ کسی بلے باز کو اس انداز میں آؤٹ دیا گیا۔’’ قانون کے تحت اگر فیلڈنگ ٹیم بلے باز کو رن آئوٹ کرنے کی کوشش کر رہی ہو تو وہ جان بوجھ کو گیند کو چھو نہیں سکتا۔ اس معاملے میں فیلڈنگ ٹیم اپیل کرنے کا حق رکھتی ہے ‘‘۔ برائن کے خیال میں امپائر نے غلط فیصلہ تو نہیں دیا، البتہ حریف ٹیم نے غلط اسپورٹسمن شپ کا مظاہرہ ضرور کیا۔’’میں نے دوسری ہی گیند پر اس بولر کو ایک چھکا رسید کیا تھا، شاید اسی وجہ سے وہ مجھے آئوٹ دیکھنا چاہتے تھے۔‘‘ اس میچ میں برائن کی ٹیم 58 رنز سے شکست کھا گئی۔
