لندن، 6 اپریل (سیاست ڈاٹ کام) چیلسی اور اسٹوک فٹبال ٹیموں کے درمیان پریمیر لیگ میچ اس وقت توجہ کا مرکز بن گیا جب اسٹوک سٹی کے کھلاڑی چارلی آڈم نے 66 گز کی دوری سے گیند کو جال میں پہنچایا۔ انگلش پریمیئر لیگ میں چیلسی اور اسٹوک کی ٹیمیں آمنے سامنے ہوئیں۔ چیلسی کی جانب سے ہیزرڈ نے میچ کے 39ویں منٹ پر پہلا گول کر کے میچ کا فاتحانہ آغاز کیا۔ چیلسی کی جانب سے دوسرا گول ریمی نے میچ کے 62ویں منٹ پر کیا اور ٹیم کی دو ایک سے فتح یقینی بنائی۔ تاہم اسٹوک سٹی کے کھلاڑی چارلی نے چیلسی کے خلاف 66 گز کی دوری سے گیند گول پوسٹ میں پہنچا کر سب کر حیران کر دیا۔ اس سے پہلے 2006ء میں لیور پول کے مڈ فیلڈر ڑابی الونزو نے 70 گز کی دوری سے بال کو جال کی راہ دکھائی تھی۔ جبکہ 2013ء میں اسٹوک سٹی کلب کے ہی گول کیپر ایزمیر بگوویچ نے 92 میٹرز کی دوری سے گول داغ کر کے تاریخ رقم کی۔
