لکھنوء،یکم اکتوبر(سیاست ڈاٹ کام) سماج وادی پارٹی(ایس پی) کے سربراہ اکھلیش یادو نے کہا کہ پولیس کو فرضی مڈبھیڑ کے لئے اکسانے کا نتیجہ ہے کہ ایک بین الاقوامی کمپنی کے افسر کا قتل کر دیا گیا۔مسٹر یادو نے پیر کو صحافیوں سے بات کرتے ہوئے کہا کہ ایپل کمپنی کے افسر کے قتل نے اتر پردیش کو پوری دنیا میں شرمسار کیا ہے ۔ریاست میں قانون کا نظام نیست و نابود ہوچکا ہے ۔ ملزم تو کیا پولیس والے ہی اب عام شہریوں کے جان کے دشمن بنے ہوئے ہیں۔ ریاست میں ایک کے بعد ایک ہو رہے فرضی انکاونٹر سے پوری ریاست سہمی ہوئی ہے ۔انہوں نے کہا کہ ریاست کے وزیر اعلی اور نائب وزیر اعلی پر مجرمانہ مقدمات درج ہیں۔ ایس پی مسلسل یہ کہتی رہی ہے کہ یوگی آدتیہ ناتھ کی قیادت والی بی جے پی کی حکومت سے قانون اور انتظام و انصرام کی بہتری کی توقع رکھنا فضول ہے ۔ وزیر اعلی اسمبلی میں ڈرانے کی زبان بولتے ہیں ۔وہ پولیس والوں سے کہتے ہی” ٹھوک دو ان کو” ۔ یہ اسی کا نتیجہ ہے کہ پولیس کھلے عام لوگوں کو گولی مار رہی ہے ۔
