لاہور ، 25 مئی (سیاست ڈاٹ کام) زمبابوے کے خلاف تین ایک روزہ میچوں کی سیریز کیلئے پاکستان کے 16 رکنی اسکواڈ کا اعلان کردیا گیا ہے جہاں شعیب ملک اور محمد سمیع کی ٹیم میں واپسی ہوئی ہے۔ پاکستان نے زمبابوے کے خلاف ٹی ٹوئنٹی سیریز میں 2-0 سے کامیابی کے کچھ ہی دیر بعد ونڈے سیریز کیلئے اپنے اسکواڈ کا اعلان کر دیا ہے۔ دونوں ٹیموں کے درمیان سیریز کا پہلا میچ منگل 26 مئی کو یہیں قذافی اسٹیڈیم میں کھیلا جائے گا۔ پاکستان کرکٹ بورڈ(پی سی بی) نے بنگلہ دیش کے خلاف سیریز میں 0-3 کی خفت سے دوچار ہونے والی ٹیم کے قائد اظہر علی پر اعتماد کا اظہار کرتے ہوئے انھیں قیادت کے منصب پر برقرار رکھا ہے۔ تجربہ کار شعیب ملک کے ساتھ ساتھ احمد شہزاد، محمد سمیع، انور علی اور حماد اعظم کی بھی ٹیم میں واپسی ہوئی ہے جبکہ نوجوان سمیع اسلم کو اسکواڈ سے ڈراپ کردیا گیا ہے۔ اس سیریز کیلئے عماد وسیم کو پہلی مرتبہ پاکستانی نیشنل ٹیم کا حصہ بنایا گیا ہے۔ زمبابوے کے خلاف سیریز کیلئے معلنہ اسکواڈ ان کھلاڑیوں پر مشتمل ہے:
اظہر علی(کپتان)، احمد شہزاد، محمد حفیظ، بابر اعظم، حارث سہیل، شعیب ملک، اسد شفیق، سرفراز احمد، حماد اعظم، انور علی، عماد وسیم، محمد رضوان، محمد سمیع، یاسر شاہ، وہاب ریاض اور جنید خان۔
