پاکستان کو ٹسٹ درجہ بندی میں اپنا مقام بہتر بنانے کا موقع

دبئی۔16 نومبر (سیاست ڈاٹ کام ) پاکستان کے پاس ٹسٹ درجہ بندی میں چوتھا مقام حاصل کرنے کا سنہری موقع ہے اور سیریز میں کلین سوئپ پاکستان یہ مقام دلا دے گی جبکہ پاکستان نے اس جانب پہلا کامیاب قدم بھی اٹھالیا ہے جیسا کہ اس نے پہلے ٹسٹ کے پہلے دن کھیل ختم ہونے سے قبل ہی نیوزی لینڈ کو 153 رنز پر ڈھیر کردیا۔ پاکستان اور نیوزی لینڈ کے مابین تین ٹسٹ میچز پر مشتمل سیریز کا پہلا مقابلہ دبئی انٹر نیشنل کرکٹ اسٹیڈیم میں شروع ہوگا۔عالمی درجہ بندی میں ہندوستان پہلے، جنوبی افریقہ دوسرے اور انگلینڈ تیسرے نمبر پر موجود ہیں۔ سیریز کے آغاز سے قبل ٹسٹ کرکٹ کی عالمی درجہ بندی میں پاکستانی ٹیم 95 پوائنٹس کے ساتھ ساتویں نمبر پر ہے جبکہ نیوزی لینڈ 102پوائنٹس کے ساتھ اعشاریائی پوائنٹس کے فرق سے آسٹریلیا سے آگے چوتھے مقام پر موجود ہے۔ اگر سرفراز کی زیر قیادت ٹیم اس سیریز میں 2-1 یا 1-0 سے فتح سمیٹنے میں کامیاب رہتی ہے تو اس کے پوائنٹس کی تعداد 99 ہو جائے گی جبکہ نیوزی لینڈ کے نشانات کم ہو کر 98 رہ جائیں گے جس کے بعد پاکستان پانچویں اور نیوزی لینڈ چھٹے مقام پرآجائے گا۔ سیریز میں 0-2 سے فتح سے پاکستان کے پوائنٹس کی تعداد 101 ہو جائے گی لیکن وہ پانچویں نمبر پر ہی رہے گی لیکن نیوزی لینڈ کے پوائنٹس کم ہو کر 96 رہ جائیں گے اور وہ 7ویں نمبر پر آجائے گی۔ اگر پاکستانی ٹیم سیریز میں نیوزی لینڈ کے خلاف3-0 سے کامیابی حاصل کرتی ہے تو اس کے پوائنٹس103ہوجائیں گے جس کے ساتھ ہی ٹسٹ رینکنگ میں چوتھے مقام بھی اس کے قبضے میں آجائے گی جبکہ نیوزی لینڈ کے پوائنٹس 94رہ جائیں گے۔