اسلام آباد۔17 نومبر (سیاست ڈاٹ کام) ہندوستانی ہائی کمیشن نے ہاکی ورلڈ کپ میں شرکت کیلئے پاکستانی ہاکی ٹیم کو ویزے جاری کردئیے تاہم چیف کوچ توقیر ڈار،کوچ دانش کلیم اورکھلاڑی عرفان جونیئر کا ویزا ملنا ابھی باقی ہے۔ پی ایچ ایف نے ستمبر کے آخری ہفتے میں ویزا درخواستوں کے ساتھ دوسری ضروری سفری دستاویزات جمع کروائی تھیں جبکہ چیف کوچ توقیر ڈار،کوچ دانش کلیم اور سینئر کھلاڑی راشد محمود کی درخواستیں چند روز پہلے دی تھیں۔ 2016 ء میں ہندوستان نے پاکستان جونیئر ہاکی ٹیم کو ورلڈکپ کے لئے ویزے دینے سے انکارکردیا تھا۔ اس مرتبہ پاکستان ہاکی ٹیم کو ویزوں کے معاملے میں انٹرنیشنل ہاکی فیڈریشن نے اہم کردار ادا کیا ہے۔چیف کوچ توقیر ڈار نے کہا ہے کہ پاکستانی ٹیم کو ویزے جاری ہونا خوش آئند ہے۔ ایف آئی ایچ کے ایونٹ میں ہندوستان جان بوجھ کر رکاوٹ پیدا نہیں کرسکتا۔ باقی 3 ویزے بھی پیر تک مل جائیں گے۔ ٹیم کا چند دن پہلے ہندوستان جانے سے بہت فائدہ ہوگا۔ ورلڈ کپ کی تیاریوں کیلئے پاکستانی ہاکی ٹیم کاکیمپ لاہور کے نیشنل ہاکی اسٹیڈیم میں جاری ہے۔رضوان سینیئر کی قیادت میں پاکستان ہاکی کا 18رکنی اسکواڈ21نومبر کو ہندوستان کے شہر بھوبینشور روانہ ہو گا۔
