لوزان ۔13 جولائی (سیاست ڈاٹ کام)انٹرنیشنل ہاکی فیڈریشن(ایف آئی ایچ) نے پاکستان کو یقین دہانی کروائی ہے کہ اسے رواں سال ہندوستان میں مقررہ ہاکی ورلڈ کپ کے لیے ویزا کے حصول میں کسی قسم کی مشکلات پیش نہیں آئیں گی۔ہاکی ورلڈ کپ کا 14واں ایڈیشن رواں سال 28 نومبر تا 16دسمبر ہندوستان کے شہر بھوبھنیشور میں منعقد ہو گا جس میں پاکستان سمیت دنیا کی 16ٹیمیں شرکت کریں گی۔پاکستان ہاکی فیڈریشن کے سربراہ بریگیڈیئر ریٹائرڈ خالد سجاد کھوکھر نے میڈیا سے گفتگو کرتے ہوئے کہا کہ انٹرنیشنل ہاکی فیڈریشن کی مداخلت کی بدولت اس مرتبہ ہندوستان میں منعقدہ ایونٹ میں پاکستان کی شرکت پر کوئی مسئلہ نہیں ہو گا۔ویزا کے حصول کے حوالے سے ایف آئی ایچ کے سربراہ نریندر بترا سے ہماری تفصیلی بات چیت ہوئی اور ان سمیت تمام عہدیداروں نے ہمیں ہدایات دیں کہ ورلڈ کپ کے ویزا کے لیے پاکستانی کھلاڑیوں اور معاون عملہ کی درخواستیں جمع کروانے کا کام بروقت شروع کردیں تاکہ ویزا کے اجرا میں کوئی مسئلہ نہ ہو۔
