دبئی، 4 مئی (سیاست ڈاٹ کام) بنگلہ دیش کے خلاف حالیہ پہلے ٹسٹ میں بدترین کارکردگی اور میچ ڈرا کرانے کے باوجود پاکستانی کرکٹ ٹیم انٹرنیشنل کرکٹ کونسل (آئی سی سی) کی ٹسٹ رینکنگ میں چوتھے سے تیسرے نمبر پر آگئی ہے۔ پاکستان کی اس ترقی کی وجہ پاکستان کی اپنی کارکردگی نہیں بلکہ دراصل یہ انگلش کرکٹ ٹیم کی مرہون منت ہے جو ایک درجہ تنزلی کے بعد آئی سی سی کی درجہ بندی میں چوتھے نمبر تک گھٹ چکی ہے۔ ویسٹ انڈیز اور انگلینڈ کے درمیان تین ٹسٹ کی سیریز کے تیسرے ٹسٹ میچ میں ویسٹ انڈیز کی فتح کے ساتھ سیریز 1-1 سے برابر ہوئی اور انگلش ٹیم کو ہار کا خمیازہ آئی سی سی رینکنگ میں تنزلی کی صورت میں بھگتنا پڑا۔ آئی سی سی رینکنگ میں مزید کوئی تبدیلی نہیں ہوئی اور جنوبی افریقہ 124 پوائنٹس کے ساتھ بدستور پہلے نمبر پر ہے جبکہ آسٹریلیا کا 118 پوائنٹس کے ساتھ دوسرا نمبر ہے۔ پاکستان (103) تیسرے، انگلینڈ (102) چوتھے، نیوزی لینڈ (99) پانچویں، سری لنکا (96) چھٹے، ہندوستان (95) ساتویں، ویسٹ انڈیز (79) آٹھویں جبکہ بنگلہ دیش اور زمبابوے بالترتیب نویں اور دسویں درجے پر ہیں۔
