دبئی ۔2 اپریل (سیاست ڈاٹ کام ) آئی سی سی نے ونڈے کرکٹ کی سالانہ درجہ بندی کا اعلان کردیا ہے۔ تازہ ترین درجہ بندی کے مطابق انگلینڈ کی ٹیم بدستور پہلے مقام پر فائز ہے جبکہ ویراٹ کوہلی کی زیر قیادت ہندوستان کا نمبر دوسرا ہے ۔نیوزی لینڈ نے تیسرے مقام پر اپنا ڈیرہ جمایا ہوا ہے۔ آئی سی سی کی سالانہ درجہ بندی میں آسٹریلیا پانچویں اور پاکستان چھٹے نمبر پر ہے۔ پاکستانی ٹیم کلین سویپ شکست کے باوجود چھٹا مقام بچانے میں کامیاب رہی ہے۔ آسٹریلیا نے عرب امارات میں پاکستان کو ونڈے سیریز میں 0-5 سے شکست دی لیکن اس سے ٹیم کے پوائنٹس ٹیبل میں کسی قسم کا اضافہ نہیں ہوا اور وہ 108 نشانات کے ساتھ پانچویں مقام پر ہی ہے۔ونڈے کی نئی عالمی درجہ بندی میں انگلینڈ کی ٹیم 123 نشانات کے ساتھ پہلے جب کہ ہندوستان 120 نشانات سے دوسرے نمبر پر ہے، نیوزی لینڈ 112 نشانات کے ساتھ تیسرے، جنوبی افریقہ 112 نشانات ہی کے سے چوتھے نمبر پر ہے۔ آسٹریلیا سے کلین سوئپ شکست کے بعد پاکستانی ٹیم 100 نشانات سے 97 نشانات پرپہنچ گئی لیکن اس کا چھٹا مقام برقرار ہے۔ دوسری جانب ٹسٹ درجہ بندی میں بدستور ہندوستان سر فہرست ہے۔
