ماسکو۔2 جون (سیاست ڈاٹ کام )فٹبال کی عالمی تنظیم فیفا کے زیر اہتمام 14 جون کو شروع ہونے والے عالمی فٹ بال کپ میں مجموعی طور پر 32 ٹیمیں مد مقابل آئیں گی۔ ایک ماہ تک جاری رہنے والے اس میگا ایونٹ میں کل 64 میچ کھیلے جائیں گے جیسے دیکھنے کیلئے تقریباً 10 لاکھ سے زائد غیر ملکی شائقین روس کا رخ کریں گے۔ اعداد و شمار اکھٹا کرنے والے ایک ادارے کے مطابق فٹ بال کے رواں سال عالمی کپ کو صرف ٹی وی پر ہی دیکھنے والوں کی تعداد 3.2 بلین ہو گی، جو دنیا کی تقریبا نصف آبادی کے برابر ہے۔ ٹورنمنٹ میں آئس لینڈ اور پاناما کی ٹیمیں پہلی مرتبہ رسائی کرتے ہوئے حصہ لیں گی۔ ایران دوسری مرتبہ عالمی کپ کھیلے گا۔ یہ پہلی مرتبہ ہوگا جب فٹبال ورلڈ کپ کے میچ 2براعظموں، یورپ اور ایشیا میں کھیلے جائیں۔ رواں سال عالمی چیمپیئن کا تاج سر پر سجانے والی ٹیم کو38 ملین ڈالرس کی انعامی رقم دی جائے جبکہ دوسرے نمبر پرآنے والی ٹیم 28 ملین ڈالر انعامی رقم کی حقدار ٹھہرے گی۔ برازیل وہ واحد ملک ہے جس نے نہ صرف اب تک کے تمام ورلڈ کپ مقابلوں میں حصہ لیا ہے بلکہ سب سے زیادہ خطابات بھی اسی ملک نے جیتے۔ جرمنی ورلڈ کپ کے گزشتہ 3 ٹورنامنٹس میں سب سے زیادہ گول کرنے والی ٹیم رہی ہے۔ جرمن فٹ بال ٹیم 2006ء میں 14گول، 2010ء میں 16 گول جبکہ 2014ء میں 18 گول کے ساتھ سرفہرست رہی ہے۔
