کراچی ۔23 اپریل (سیاست ڈاٹ کام ) پاکستانی کرکٹ ٹیم کے ہیڈ کوچ مکی آرتھر دورہ انگلینڈ پر روانگی سے قبل منعقدہ پریس کانفرنس میں کہا کہ ورلڈ کپ میں جیتنے کی ضمانت نہیں دے سکتے لیکن بہترین کھیل پیش کریں گے۔ دورہ انگلینڈ اور ورلڈ کپ کے لیے روانگی سے قبل لاہور میں پریس کانفرنس کرتے ہوئے مکی آرتھر اور ٹیم کے کپتان سرفراز احمد نے ورلڈ کپ کے دوران بہترین کھیل پیش کرنے کے عزم کا اظہار کیا۔کوچ مکی آرتھر نے کہا کہ ورلڈکپ کے لیے بہترین تیاری کی ہے، کامیابی کی ضمانت نہیں دے سکتے لیکن بہترین کھیل پیش کریں گے۔ مکی آرتھر نے کہا کہ میں سمجھتا ہوں کہ ہماری ٹیم بہت اچھی ہے، ہمارا ابتدائی ہدف سیمی فائنلز میں رسائی حاصل کرنا ہے۔ ہمیں تمام میچز ہی اچھے کھیلنا ہوں گے، ٹیم میں جیتنے کی صلاحیت موجود ہے لیکن ورلڈکپ میں بہت اچھی ٹیمیں موجود ہوں گی۔ ہیڈ کوچ نے کہا کہ ہماری ٹیم متوازن ہے، محمد حفیظ اور شعیب ملک کی بولنگ پر اعتماد ہے، محمد حفیظ نے ٹریننگ میں بھی بہترین کارکردگی دکھائی جس پر انتہائی خوشی ہے۔ انہوں نے کہا کہ ہمارے اسکواڈ کی بات کی جائے تو ہمارے پاس تمام ہر طرح کا کھلاڑی موجود ہے ،محمد حفیظ اور شعیب ملک سے ان کے رول کے مطابق کام لیں گے۔ ایک سوال کے جواب میں مکی آرتھر نے کہا کہ بابر اعظم کے اندر دنیا کا بہترین بیٹسمین بننے کی صلاحیت موجود ہے۔ ورلڈ کپ میں بابر اعظم کا کردار بہت اہم ہے اگر وہ سنچری بنالیتے ہیں تو اس سے ٹیم کو فائدہ ہوگا۔ یاسر شاہ سے متعلق سوال پر انہوں نے کہا کہ یاسر شاہ نے تیز ترین 200 وکٹیں حاصل کی ہیں، جس سے ظاہر ہوتا ہے کہ وہ اچھی بولنگ کرسکتے ہیں۔ مکی آرتھر نے کہا کہ میں کھلاڑیوں کی کارکردگی سے مطمئن ہوں اور ان کی صلاحیتوں پر مکمل اعتماد ہے۔ عثمان شنواری کی کارکردگی بہترین رہی ہے، یہ بدقسمتی ہیکہ وہ اسکواڈ کا حصہ نہیں ہیں تاہم ان کے مقابلے میں حسن علی ایک سینئر بولر ہیں۔ ہیڈ کوچ نے کہا کہ شاہین شاہ آفریدی میں بے پناہ صلاحیت ہے، فہیم اشرف کی کارکردگی میں بہتری آرہی ہے اور وہ آل راؤنڈر بننے کی کوشش کررہے ہیں۔ عماد وسیم کی کارکردگی میں بہتری آرہی ہے وہ بہت زیادہ محنت کررہے ہیں۔ کھلاڑیوں کی صلاحیتوں اور کارکردگی پر توجہ مرکوز کی ہے اور فٹنس پر سمجھوتہ نہیں کیا۔ ہیڈ کوچ نے کہا کہ شاداب خان ابھی ورلڈکپ سے باہر نہیں ہوئے، امید ہے وہ واپس آجائیں گے، بدقسمتی ہے انگلینڈ کے خلاف شاداب خان کی خدمات حاصل نہیں ہیں۔ ٹیم میں صرف ایک کھلاڑی پر منحصر نہیں، ہمارے پاس 15 کھلاڑیوں کا بہترین اسکواڈ موجود ہے۔ دریں اثناء ٹیم کے کپتان سرفراز احمد نے کہا کہ ہماری ٹیم کی تیاری بہت اچھی ہے، ہم نے کیمپ میں ورلڈکپ کی تیاری کے لیے بہت محنت کی۔ ایک سوال کے جواب میں سرفراز احمد نے کہا کہ آسٹریلیائی سیریز میں 7 سے 8 اہم کھلاڑی ٹیم کا حصہ نہیں تھے، جو ہم نے غلطیاں کیں انہیں دور کرنے کی کوشش کی ہے۔ میچ میں بیٹنگ سے متعلق سوال پر انہوں نے کہا کہ میری کوشش ہوگی کہ میں ٹاپ 5 میں بیٹنگ کروں۔
