دمشق۔22 اکٹوبر ۔ ( سیاست ڈاٹ کام ) دولت اسلامیہ میں شمولیت اختیار کرنے والے ایک آسٹریلیائی نوجوان نے ایک ویڈیو پیغام میں آسٹریلیا اور امریکی سربراہوں سے کہا ہے کہ ہم ہتھیار نہیں ڈالیں گے،بکنگھم پیالس اور وائٹ ہاؤس پر کالا جھنڈا لہرائیں گے۔ برطانوی خبر رساں ادارے کے مطابق 17 سالہ عبداللہ المیرنے، جو اپنے آپ کو ابو خالد کہتا ہے کہا ہے کہ ہم اس وقت تک ہتھیار نہیں ڈالیں گے جب تک تمھاری سرزمینوں پر نہیں آجاتے۔ وہ جون میں ایک اور آسٹریلیائی نوجوان کے ساتھ ملک سے بھاگ گیا تھا اور خیال ہے کہ وہ ترکی کے راستے شام میں داخل ہوا۔ ساتھ آنے والے دوسرے لڑکے کو اس کے والد نے روک لیا اور وہ واپس سڈنی چلا گیا ہے۔ دولتِ اسلامیہ کے خلاف امریکہ کی سربراہی والے اتحاد میں آسٹریلیا اہم شراکت دار ہے۔
اس نے شام اور عراق میں جنگ کیلئے 600 فوجی بھیجنے کا فیصلہ کیا ہے۔ اس ہفتے کے اوائل میں اس نے عراق سے ایک معاہدہ کیا تھا جس کے تحت اس کے 200 خصوصی فوجی عراقی فوجیوں کی تربیت کریں گے۔ آسٹریلیائی نوجوان نے مزید کہا ہے کہ ہم اس وقت تک نہیں رکیں گے جب تک ہم سیاہ جھنڈا بکنگھم پیالس اور وائٹ ہاؤس کے اوپر نہیں لہرا لیتے۔
