لندن۔10 جولائی (سیاست ڈاٹ کام) برطانیہ کے قصبے کولچسٹر میں ہوم فارم پرائمری اسکول کے پرنسپل نے برازیلی اسٹار نیمار جونیئر کی وجہ سے اسکول کے طلبا پرایک ہفتے کے لیے فٹبال کھیلنے پر پابندی عائد کردی ہے۔یہ فیصلہ بچوں کی جانب سے ظاہر ہونے والے ان خراب رویوں کے باعث کیا گیا جو عالمی کپ فٹ بال کے میچوں میں شریک نامور کھلاڑیوں خصوصاً نیمر کی نقل کرتے ہوئے سامنے آئے۔اسکول انتظامیہ کے مشاہدے میں یہ بات آئی کہ بچے کھیل کے دوران اختلاف اور جھگڑے کی صورت میں بہت اونچی آواز کے ساتھ لڑتے ہیں، ساتھ ہی یہ بات بھی سامنے آئی کہ بچے کھیل کو ضرورت سے زیادہ سنجیدگی سے لے رہے ہیں۔اس دوران ورلڈ کپ فٹ بال میں شریک ٹیموں اور ان کے کھلاڑیوں کا انداز اپنانے کی کوشش کی جارہی تھی جس میں نیمر جونیئر کی طرح زخمی ہونے کا ڈرامہ کرنا سرفہرست ہے۔اس کے ساتھ اسکول کے ان بچوں نے کھلاڑیوں کی طرح ایک دوسرے سے جھگڑنے، ریفری سے اختلاف کرنے، چیخ چیخ کر کھیلنے اور زخمی ہونے کے ڈرامے جیسی حرکتیں شروع کردی تھیں۔اسکول انتظامیہ کے مطابق مقررکردہ قواعد و ضوابط کی پابندی کی صورت میں اسکول کے بچے دوبارہ سے فٹ بال کھیل سکتے ہیں۔اسکول کے پرنسپل رچرڈ پوٹر نے کہا ہے کہ وہ بچوں کی اس بات پر حوصلہ افزائی چاہتے ہیں کہ وہ منصفانہ طریقے سے کھیل کو کھیلیں اور اس دوران اخلاقیات اور کھیل کی روح کا خیال رکھیں۔انہوں نے کہا کہ ان بچوں کی عمریں محض 4 تا 11 برس کے درمیان ہیں اور یہ لوگ بڑے کھلاڑیوں کی نقل کر رہے ہیں۔ اس کے نتیجے میں بہت سی تلخ باتیں سامنے آتی ہیں، اس طرح یہ کھیل کو اس کی اصل روح کے مطابق کھیلنے کا فن نہیں سیکھ سکیں گے۔برازیل کے نیمر جونیئر کا شمار دنیا کے صف اول کے کھلاڑیوں میں ہوتا ہے لیکن 2018 ورلڈ کپ میں وہ اپنے کھیل سے زیادہ ڈرامہ بازیوں کے لیے مشہور ہوئے۔اس کا سلسلہ تو ورلڈ کپ کے گروپ میچز سے ہوا جب سوئٹزرلینڈ کی ٹیم نے نیمر کو کھل کر کھیلنے کا موقع فراہم نہ کیا اور جگہ جگہ گراتے رہے جس کی وجہ سے اسٹار کھلاڑی کوئی اچھی کارکردگی نہ دیکھا سکے لیکن نیمر کا اصل جادوکوسٹاریکار کے خلاف میچ میں دیکھنے میں آیا، جس میں انہوں نے مخالف ٹیم کے گول پوسٹ کے پاس ایسے گرنے کا شاندار مظاہرہ کیا کہ ریفری نے پینالٹی کک دے دی لیکن نئے ویڈیو اسسٹنٹ ریفری سسٹم میں برازیلین کھلاڑی کی چالاکی پکڑی گئی اور پینالٹی واپس لے لی گئی۔سربیا کے خلاف میچ میں بھی نیمر کی ایک اور ڈرامہ بازی نے سوشل میڈیا صارفین کو ہنسنے پر مجبور کردیا۔ میچ کے 32 ویں منٹ میں سربیا کے کھلاڑی کی جانب سے نیمر کو روکا گیا تو انہوں نے زمین پر بہت دور تک گھومتے چلے جانے کا ایسا مظاہرہ کیا کہ سب دنگ رہ گئے اور ریفری بھی متاثر ہوئے بغیر نہ رہ سکے کیونکہ نیمار کی جاندار اداکاری پر سربیا کے کھلاڑی کو پیلا کارڈ دکھا دیا گیا تھا۔ایسا ہی کچھ برازیلی کھلاڑی کی جانب سے میکسیکو کے خلاف پری کوارٹر فائنل میچ میں بھی دیکھنے میں آیا جب 71 ویں منٹ میں میکسیکن کھلاڑی میگوئل لیون نے نیمر کو سائیڈ لائن کے قریب گرایا۔اس وقت جب نیمر گھاس پر لیٹے ہوئے تھے، میگوئل وہاں آئے اور گیند کو اٹھاتے ہوئے اپنا پیرنیمر کے ٹخنے پر رکھ دیا۔ بس پھر کیا تھا، نیمار نے زخمی ہونے کا وہ کمال اور جاندار اداکاری کی کہ دیکھنے والے دم بخود رہ گئے۔نیمر کے اس انداز پر ان کا سوشل میڈیا پر کافی مذاق اڑایا گیا جبکہ انہیں کافی تنقید کا سامنا بھی کرنا پڑا جس میں خود برازیل کے کوچ ٹائٹ بھی شامل ہیں۔
