پیرس۔13جون(سیاست ڈاٹ کام)عالمی نمبر ون اور11ویں مرتبہ فرنچ اوپن جیتنے والے ہسپانوی ٹینس اسٹار رافیل نڈال نے کہا ہے کہ کلے کورٹ کے سخت اور مشکل سیزن کے بعد ایک اور گرانڈ سلام ٹورنمنٹ ومبلڈن میں شرکت کے حوالے سے وہ ابھی پوری طرح تیار نہیں۔نڈال فرنچ اوپن سے پہلے کلے کورٹ پر مونٹی کارلو ، روم اور بارسلونا میں 3دیگر ٹورنامنٹس بھی جیت چکے ہیں۔ پیرس میں اپنے اعزاز میں ہونے والی تقریب کے بعد انہوں نے کہا کلے کورٹ سیزن ان کے لئے ذہنی اور جسمانی لحاظ سے بہت سخت ثابت ہوا ہے اور وہ کچھ آرام کرنے اور سنبھلنے کے بعد فیصلہ کریں گے ومبلڈن میں شرکت کریں یا نہیں۔نڈال کے بموجب کلے کورٹ کے کورٹ سے گراس کورٹ پر کھیل کی منتقلی کھلاڑی کے لئے آسان نہیں ہوتی۔اپنی کوچنگ ٹیم سے مشورے کے بعد ہی میں کوئی حتمی فیصلہ کر سکوں گا۔یاد رہے کہ ایک اور سابق عالمی نمبر ون نواک جوکووچ بھی فرنچ اوپن کے کوارٹر فائنل میں شکست کے بعد ومبلڈن میں شرکت پر غیریقینی صورت حال کا اظہار کر چکے ہیں۔یادرہے کہ ومبلڈن میں راجر فیڈرر اپنے خطاب کا دفاع کریں گے اور فیڈرر نے کلے کورٹ کا مکمل سیزن نہیں کھیلا ہے۔
