بارسلونا ، 18 مئی (سیاست ڈاٹ کام) مشہور اسپینی فٹبال کلب بارسلونا نے دفاعی چمپینس اٹلیٹکو میڈرڈ کو شکست دے کر 23ویں مرتبہ اسپانش لیگ لالیگا اپنے نام کر لی۔ واضح رہے کہ ٹھیک ایک سال قبل بارسا کے کیمپ نو میں اٹلیٹکو نے تاریخ رقم کرتے ہوئے بارسلونا کو شکست دے کر چمپئن بننے کا اعزاز حاصل کیا تھا۔ میچ شروع ہوا تو بارسلونا نے ابتدا سے ہی شاندار کھیل کا مظاہرہ کر کے اٹلیٹکو پر واضح کر دیا کہ وہ اس بار ٹائٹل کو آسانی سے نہیں دیں گے۔ میچ کے پہلے ہاف میں دونوں ہی ٹیموں نے ایک دوسرے کے ہاف پر حملے کئے لیکن کوئی بھی گول کرنے میں کامیاب نہ ہوسکا۔ دوسرے ہاف میں بارسلونا کی جارحیت میں اضافہ ہوا اور اس نے حریف کے گول پر لگاتار حملے کئے جس کا صلہ انہیں 65 ویں منٹ میں اس وقت ملا جب لیونل میسی نے پیڈرو روڈری گوئز کے ساتھ مل کر ایک خوبصورت چال بنائی اور گیند کو جال کی راہ دکھا دی۔ یہ میسی کا اس سیزن 41واں گول رہا اور یہی گول میچ میں فیصلہ کن ثابت ہوا۔ جب امپائر نے میچ ختم ہونے کا اعلان کیا تو اسکور بورڈ پر 1-0 کا ہندسہ ناصرف بارسلونا کی میچ میں فتح کا اعلان کر رہا تھا بلکہ اس کے ساتھ ساتھ انہوں اسپانش لیگ لالیگا کا چمپئن بننے کا اعزاز بھی حاصل کر لیا۔ یہ گزشتہ گیارہ سال میں ساتواں موقع ہے کہ بارسلونا نے چمپینس لیگ ٹائٹل اپنے نام کیا ہے۔ میسی کا یہ ایک گول رونالڈو کی ہیٹ ٹرک پر حاوی رہا جنہوں نے اسپنیول کے خلاف میچ میں تین گول اسکور کر کے اپنی ٹیم رئیل میڈرڈ کو میچ میں 4-1 کی فتح دلانے میں مرکزی کردار ادا کیا لیکن وہ اپنی ٹیم کو لیگ جتوانے میں ناکام رہے۔
