ممبئی۔ 4 ستمبر ۔ ( سیاست ڈاٹ کام ) بی جے پی کے قومی صدر امیت شاہ نے آج آئندہ اسمبلی انتخابات کو پارٹی کی ’’کانگریس سے پاک ہندوستان تحریک ‘‘ کا دوسرا مرحلہ قرار دیا ۔ انھوں نے نئی دہلی سے واپسی پر ایرپورٹ پر اپنا زبردست استقبال کرنے والے پارٹی کارکنوں سے خطاب کرتے ہوئے کہا کہ آئندہ اسمبلی انتخابات ہماری کانگریس مکت بھارت ابھیان کا دوسرا مرحلہ ہوں گے ۔ لوک سبھا انتخابات میں جیسے عوام نے ہماری تائید کی ہے اب بھی کریں گے ۔ انھوں نے کہاکہ کانگریس زیرقیادت مہارشٹرا حکومت انتہائی بدعنوان اور غیرموثر ہے ۔ ہندوستان کی آزادی کے بعد ایسی بدعنوان حکومت نہیں دیکھی گئی ۔ انھوں نے اعتماد ظاہر کیا کہ بی جے پی اپنے کارکنوں اور ریاستی عوام کی مدد سے اسمبلی انتخابات میں کانگریس کا صفایہ کردے گی ۔
