ڈھاکہ ۔ 25 مئی (سیاست ڈاٹ کام) بنگلہ دیش کی وزیر اعظم شیخ حسینہ نے کہا ہیکہ غیر قانونی طور پر دوسرے ممالک جانے والے بنگلہ دیشی ملک کی شبیہہ خراب کر رہے ہیں۔انھوں نے یہ بات ڈھاکہ میں لیبر اور ایمپلائمنٹ افسران سے خطاب کرتے ہوئے کہی۔انہوں نے کہا کہ غیرقانونی طور پر دوسرے ممالک جانے والے ’بیمار ذہن‘ رکھتے ہیں۔ان کا مزید کہنا تھا کہ غیر قانونی تارکین وطن کیساتھ ساتھ ان کیلئے ایسا کرنے کے انتظامات کرنے والوں کو بھی سخت سزا دی جانی چاہئے۔یاد رہیکہ بنگلہ دیش اور میانمار یعنی برما سے بہت لوگ تھائی لینڈ، انڈونیشیا اور ملائیشیا جانے کی کوشش کررہے ہیں۔رپورٹوں کے مطابق ہزاروں بنگلہ دیشی اور برما سے روہنگیا مسلمان سمندر میں کشتیوں میں پھنسے ہوئے ہیں۔ملائیشیا کے حکام کا کہنا ہیکہ اتوار کو کئی غیر قانونی تارکین وطن کی نعشیں قبروں میں سے ملی ہیں۔بنگلہ دیشی وزیر اعظم کا کہنا ہیکہ غیر قانونی طور پر دوسرے ممالک جانے والے افراد اور وہ لوگ جو لوگوں کو غیر قانونی طور پر لے کر جاتے ہیں دونوں ہی کو سزا دینی چاہئے۔انہوں نے کہا کہ اس سے ’عالمی سطح پر ملک کی بدنامی ہوتی ہے اور لوگوں کی جانیں خطرے میں ڈال دی جاتی ہے۔ غیر قانونی تارکین وطن کیلئے بنگلہ دیش میں کام ہے لیکن پھر بھی وہ اپنی جانیں ہتھیلی پر رکھ کر سفر کرتے ہیں۔‘
