نئی دہلی۔23 فروری (سیاست ڈاٹ کام) پلوامہ حملے کے بعد یہ مطالبہ کیا جارہا ہے کہ ہندوستانی کرکٹ ٹیم کو ورلڈ کپ میں پاکستان کے میچ کا بائیکاٹ کرنا چاہئے تاہم اس معاملے پر اکثریت کی رائے منقسم ہے۔ جہاں کچھ لوگوں کا ماننا ہے کہ ہندوستان کو میچ کا بائیکاٹ کرنا چاہئے وہیں کچھ میچ کھیلنے کی حمایت بھی کررہے ہیں۔ اس معاملہ پر ہندوستانی کرکٹ کے ’’دیوتا‘‘ کہے جانے والے سابق ماسٹر بلاسٹر سچن تنڈولکر نے بھی اپنی رائے ظاہر کی ہے۔ سچن کا ماننا ہے کہ ہندوستان کو میچ کا بائیکاٹ نہیں کرنا چاہئے کیونکہ اس سے پاکستان کوہی فائدہ ہوگا۔ سچن نے کہا کہ مجھ کو ورلڈ کپ میں پاکستان سے میچ نہ کھیل کر انہیں دو پوائنٹس دینے سے زیادہ دکھ ہوگا کیونکہ اس سے انہیں مدد ملے گی۔ سچن نے مزید کہا کہ ورلڈ کپ میں ہندوستان نے ہمیشہ پاکستان کو شکست دی ہے ، اس مرتبہ پھر انہیں شکست دینے کا وقت ہے۔ یاد رہے کہ بی سی سی آئی نے ورلڈ کپ میں پاکستان سے میچ کھیلنے کو حکومتی اجازت سے مشروط کردیا ہے۔ بورڈ کے عہدیدارنے کہا ہے کہ اگر ہماری حکومت نے کہا تو پاکستان کے ساتھ ورلڈکپ میچ نہیں کھیلیں گے۔ پاکستان کیخلاف ورلڈ کپ میچ کے حوالے سے صورتحال کچھ روز بعد واضح ہو گی، اگر میگا ایونٹ کے وقت حکومت محسوس کرتی ہے کہ پاکستان کے ساتھ نہیں کھیلنا چاہیے تو ہم ایسا ہی کریں گے، ظاہر ہے کہ ہندوستانی ٹیم نہیں کھیلے گی تو پاکستان کو دوپوائنٹس ملیں گے۔ اگر فائنل میں دونوں ٹیمیں مقابلہ ہوئیں تو پاکستان بغیر میچ کھیلے چمپئن بن جائیگا۔ ابھی تک بی سی سی آئی کی اس حوالے سے آئی سی سی کیساتھ کوئی بات نہیں ہوئی۔ دریں اثناء رواں ماہ کے آخری ہفتے میں دبئی میں ہونے والے آئی سی سی اجلاس میں ہند۔پاک میچ کا معاملہ بھی زیرِغورآسکتا ہے۔ ہند۔پاک ورلڈکپ کا مقابلہ 16 جون کو مانچسٹر میں مقرر ہے۔
