فیصل آباد ، 13 مئی (سیاست ڈاٹ کام) پاکستان کے فاسٹ بولر محمد عامر نے ڈومیسٹک کرکٹ میں شاندار کارکردگی دکھا کر آئندہ سال ہونے والے ورلڈ ٹی ٹوئنٹی کیلئے نیشنل ٹیم میں شمولیت کو اپنا ہدف بنا لیا ہے۔ گزشتہ روز میڈیا سے گفتگو کرتے ہوئے عامر نے کہا کہ ’’میں میچ میں بولنگ کر کے بہت لطف اندوز ہوا اور اتنی جلدی وکٹ لینا بہت بہترین لمحہ تھا‘‘۔ عامر نے کہا کہ ’’میری توجہ آئندہ سال انڈیا میں ہونے والے ورلڈ ٹی ٹوئنٹی کیلئے پاکستانی ٹیم میں واپسی پر مرکوز ہے‘‘۔ بائیں ہاتھ کے فاسٹ بولر نے گزشتہ ماہ پیٹرنز ٹرافی میں شرکت کر کے 22 وکٹیں حاصل کی تھیں۔ عامر پر عائد کی گئی پابندی کا خاتمہ ستمبر میں ہونا ہے لیکن انٹرنیشنل کرکٹ کونسل (آئی سی سی) نے ان کے رویے کو مدنظر رکھتے ہوئے رواں سال جنوری میں ان کی سزا میں نرمی کرتے ہوئے ڈومیسٹک مقابلوں میں شرکت کی اجازت دے دی۔ یہ فیصلہ پاکستان کرکٹ بورڈ کی جانب سے کرکٹ کی ورلڈ گورننگ باڈی کو کی گئی درخواست کے بعد سامنے آیا تھا جس میں عامر کی سزا کم کرنے کی استدعا کی گئی تھی۔ ستمبر میں عامر کی پابندی کے خاتمے کے بعد پی سی بی اُن کی ٹیم میں شمولیت کے حوالے سے فیصلہ کرے گی۔ پابندی کے وقت عامر دنیا کے بہترین بولرز میں سے ایک تھے اور انہوں نے ٹسٹ، ایک روزہ اور ٹی 20 میچوں میں بالترتیب 51، 25 اور 23 وکٹیں حاصل کی تھیں۔
