لندن ۔19 ڈسمبر (سیاست ڈاٹ کام ) انگلینڈ کے مشہور فٹبال کلب مانچسٹر یونائیٹڈ نے رواں سال ناقص کارکردگی اور 30 سال میں کلب کے بدترین آغاز کے بعد ٹیم کے منیجر ہوزے مورینیو کو برطرف کرتے ہوئے اسسٹنٹ منیجر کو عبوری طور پر ذمے داریاں سونپ دی ہیں۔ پرتگال کے 55 سالہ مورینیو نے لیورپول کے خلاف میچ میں کلب کے لیے آخری مرتبہ منیجر کی حیثیت سے میدان میں اترے اور اس میچ میں 1-3 سے شکست کے ساتھ ہی یونائیٹڈ اور لیورپول کے درمیان ٹیموں کے جدول میں 19نشانات کا فرق ہو گیا ہے۔ رواں سیزن میں مانچسٹر یونائیٹڈ کو بدترین بحران کا سامنا ہے اور 1990 کے بعد یہ کسی بھی سیزن میں کلب کا بدترین آغاز ہے اور وہ صف اول کی 4 ٹیموں سے 11 نشانات پیچھے ہے جس کے سبب اس کے چمپیئنز ٹرافی کے لئے کوالیفائی کرنے کا بھی خطرہ ہے۔ رواں سال جاری چمپیئنز لیگ میں مانچسٹر یونائیٹڈ کی ٹیم ناک آؤٹ مرحلے میں پہنچ چکی ہے جہاں اسے پیرس سینٹ جرمین کا چیلنج درپیش ہے لیکن منیجر کی برطرفی کی وجہ کلب کی کارکردگی میں عدم تسلسل، ڈریسنگ روم کا ماحول اور کلب کے بورڈ کی ٹرانسفر پالیسی پر تنقید ہے۔کلب کی جانب سے بیان میں کہا گیا کہ مانچسٹر یونائیٹڈ یہ اعلان کرتا ہے کہ منیجر ہوزے مورینیو نے فوری طور پر کلب چھوڑ دیا ہے۔ بیان میں کہا گیا کہ کلب مانچسٹر یونائیٹڈ کے لئے کام پر مورینیو کا شکریہ ادا کرتے ہوئے ان کے مستقبل کے لیے نیک خواہشات کا اظہار کرتا ہے اور نئے منیجر کا تقرر رواں سیزن کے اختتام تک کردیا جائے گا۔ مورینیو کو ایک منفرد اعزاز حاصل تھا کہ وہ جس کلب کے ساتھ بھی جڑے، اسے اس ملک کی پریمیئر لیگ کا چمپیئن بنوایا اور انہیں پورٹوکو پرتگال، انٹرمیلان کو اٹلی، رئیل میڈرڈ کو لا لیگا اور چیلسی کو دو مرتبہ انگلش پریمیئر لیگ کا چمپیئن بنوانے کا اعزاز حاصل ہے لیکن اب وہ اس اعزاز سے محروم ہو گئے ہیں۔2013 میں سر ایلکس فرگیوسن کی جانب سے عہدہ چھوڑنے کے بعد سے مانچسٹر یونائیٹڈ کو مستقل کارکردگی دکھانے اور نئے منیجر کے زیر سایہ لیگ جیتنے میں دشواری کا سامنا ہے۔ فرگیوسن کے بعد لوئس وین گال کو مانچسٹر کا منیجر مقرر کیا گیا تھا لیکن وہ بھی ٹیم کی قسمت نہ بدل سکے جس کے بعد مورینیو کا تقررہوا تھا لیکن وہ بھی مانچسٹر میں ناکامی سے دوچار ہوئے۔
