لندن ، 25 مئی (سیاست ڈاٹ کام) انگلینڈ کے آل راؤنڈر بین اسٹوکس نے لارڈز کے تاریخی گراؤنڈ پر تیز ترین سنچری بنانے کا اعزاز حاصل کر لیا۔ اتوار کو نیوزی لینڈ کے خلاف لارڈز ٹسٹ کے چوتھے دن اسٹوکس میدان میں آئے تو انگلینڈ کی ٹیم شدید مشکلات سے دوچار تھی اور اسے کیویز کے خلاف دوسری اننگز میں صرف 98 رنز کی برتری حاصل تھی جبکہ اس کے چار بہترین بلے باز پویلین لوٹ چکے تھے۔ اسٹوکس نے اپنی جارحانہ بلے بازی کی بدولت لارڈز پر تیز ترین سنچری کا ریکارڈ بنانے کے ساتھ ساتھ اپنی ٹیم کی پوزیشن مضبوط کر کے نیوزی لینڈ کا فتح کا خواب چکناچور کردیا۔ اسٹوکس نے صرف 85 گیندوں پر تین چھکوں اور 15 چوکوں کی مدد سے سنچری بنا کر یہ اعزاز حاصل کیا۔ اس سے قبل لارڈز پر تیز ترین سنچری کا اعزاز سابق ہندوستانی کپتان محمد اظہرالدین کا تھا ،جنہوں نے 1990ء میں 87 گیندوں میں سنچری بنائی تھی۔ اس کے ساتھ اسٹوکس نے انگلینڈ کی جانب سے ٹسٹ میں دوسری تیزترین سنچری کا بھی اعزاز حاصل کر لیا۔ تیز ترین سنچری کا اعزاز گلبرٹ جیسپ کے نام ہے جو انہوں نے 1902 ء میں آسٹریلیا کے خلاف 76 گیندوں پر تین ہندسوں کی اننگز کھیل کر بنایا تھا۔
