لندن۔28 مئی (سیاست ڈاٹ کام ) لارڈز ٹسٹ میں سلو اوور ریٹ پر پاکستانی ٹیم کو جرمانہ کر دیا گیا ہے، کپتان سرفراز احمد کو میچ فیس کا 60 فیصد جبکہ باقی کھلاڑیوں کو 30,30 فیصد جرمانہ کیا گیا۔آئی سی سی کے میچ ریفری جیف کرو نے میدان پر موجود امپائرز پال رائفل، راڈ ٹکر اور فورتھ امپائر روب بیلی کی جانب سے سرفراز کی زیر قیادت ٹیم پر مقررہ وقت میں 3 اوورز کم کروانے پر جرمانہ کی سزا سنائی۔ آئی سی سی قوانین کے مطابق سلو اوور ریٹ پر ٹیم کے ہر کھلاڑی کو فی اوور 10,10 فیصد جبکہ کپتان کو دوگنا جرمانہ عائدکیا جاتا ہے۔اگر پاکستان ٹیم سرفراز احمد کی قیادت میں 12 ماہ کے دوران دوبارہ سلو اوور ریٹ کی مرتکب قرار پائی تو کپتان کو ایک میچ میں معطلی کا سامنا کرنا پڑ سکتا ہے۔ سرفراز احمد نے اپنی غلطی تسلیم کرتے ہوئے جرمانہ قبول کر لیا۔
