ماسکو۔25 جولائی (سیاست ڈاٹ کام )فیفا نے رواں سال بہترین کھلاڑی کے ایوارڈ کے لئے 10ناموں کو قطعی فہرست میں شامل کردیا ہے جس میںکرسٹیانو رونالڈواور لیونل میسی کے علاوہ ورلڈکپ میں عمدہ کارکردگی دکھانے والے کھلاڑیوں کا راج رہا۔فیفاکے بہترین کھلاڑی کے لئے10کھلاڑیوں کے ناموں کو قطعی فہرست میں شامل کیا گیا ہے جس میں ورلڈکپ کے بہترین کھلاڑی کا اعزاز اپنے نام کرنے والے کروشیا کے لوکا موڈرچ بھی شامل ہیں۔ورلڈکپ میں بیلجیئم کے لیے عمدہ کھیل پیش کرنے والے ایڈن ہیزارڈ اورکیون ڈی برون بھی اس فہرست میں جگہ بنانے میں کامیاب رہے جبکہ ان کے ہمراہ انگلینڈ کے ہیری کین بھی فہرست کا حصہ ہیں۔لیورل پول کیلیے عمدہ کھیل پیش کرنے والے مصر کے محمد صلح بھی فہرست کا حصہ ہیں لیکن پیرس سینٹ جرمین کے اسٹار فارورڈ نیمر اس فہرست میں جگہ نہ بنا سکے۔پانچ مرتبہ بیلن ڈی اور جیتنے والے پرتگال کے کرسٹیانو رونالڈو اپنے ملک کو تو ورلڈکپ میں کچھ خاطر خواہ کامیابیاں نہ دلا سکے لیکن انہوں نے 54 لیگ مقابلوں میں اتنے ہی گول اسکور کر کے ایک اور سال کو یادگار بنایا اور ان کی اس کارکردگی کی بدولت ریئل میڈرڈ نے لگاتار تیسری مرتبہ چیمپیئنز لیگ جیتنے کے علاوہ کلب ورلڈ کپ بھی جتوایا۔جن 10کھلاڑیوں کو فہرست کا حصہ بنایا گیا ہے ان میں کرسٹیانو رونالڈو، لیونل میسی، کیون ڈی برون، ایڈن ہیزارڈ، اینٹوئن گریزمین، ہیری کین، لوکا موڈرچ، کائلیان ایمباپے، محمد صلح اور رافیل ویرین شامل ہیں۔علاوہ ازیں سال کے بہترین کوچ کے لیے11 ناموں کا اعلان کیا گیا ہے جس میں عالمی چیمپیئن فرانس کے ڈائیڈیئر ڈیشمپ اور ریئل میڈرڈ کو لگاتار تین مرتبہ چیمپیئنز لیگ جتوانے والے زین الدین زیڈان شامل ہیں۔ کروشیا کے کوچ زلاٹکو ڈیلک کو ان کی ٹیم کی شاندار کارکردگی کی بدولت اس فہرست کا حصہ بنایا گیا ہے جبکہ انگلینڈ کے گیرتھ ساؤتھ گیٹ اور بیلجیئم کے روبرٹو مارٹینیز بھی امیدواروں ہیں۔ورلڈ کپ میں ناقص مظاہروں کے بعد میسی اور رونالڈو شائقین کی توجہ کا مرکز بن گئے ہیں کیونکہ ان دونوں نے کلب ٹورنمنٹس میں بہتر مظاہرے کئے ہیں۔
